1 यॊहन 1 - पुना गच्छरना NT (BSI)

उज्जना ही कत्था

¹ उज्जना चि'ऊ कत्था र'अदस, आसी पत्त नू ऎम निमा गे मेन्त'अदम। आस ऒर तिम रहचस। आसिन दिम ऎम मेंजकादम, अरा एम्है ख़न्न ती ईरकादम, अरा आसिन ऎम मानिम नू ईरकादम, अरा आसिन एम्है ख़ेक्खा गुट्ठी ती एंवसड़कम।

² एकास आ मानिम उज्जना र'अदस, आसिन धर्मेस एमा गे दहदर नंजस। अरा ऎम आसिन ईरकादम ती आसी पत्त नू गोवाह चि'अदम। धर्मे बंगस गने रहचका आ जनमजुग उज्जना ही पत्त दिम ऎम निमा गे मेन्त'अदम। अक्कु आस एमा गे दहदर मंजका र'अदस।

³ नीम हूँ एम्है गने मेस्र'आ गे, एन्द्रन ऎम ईरकादम अरा मेंजकादम अदही पत्त नू ऎम निमा मेन्त'अदम। एमा ई मेस्रना गा धर्मे बंगस गने अरा आसी ख़द्दस येसु मसीस गने र'ई।

⁴ ऎम इबड़ा कत्थन इदगे लिखदम का एम्है रिझ पुरा मनन कालन नेकअन।

धर्मेस बिल्ली हिकदस

⁵ ई कत्थन ऎम आस ती मेंजकम ती निमा गे मेन्त'अदम। धर्मेस बिल्ली हिकदस, अरा आस नू कटीसकेम हूँ ऊख़ा मलकी।

⁶ औंगे नाम धर्मेस गने मेस्रकत ती उज्जदत ब'अदत ती ऊख़ा नू उज्जा लगदत होले, नाम ठकदत अरा मानी लगे उज्जुर मल र'अदत।

⁷ लिकिन धर्मेस बिल्ली नू र'अना लेक्खा नाम हूँ बिल्ली नू उज्जोत होले, मेस्रना नाम ओर्त ओर्त गने र'ओ, अरा आसी ख़द्दस येसुसी ख़ॆंस नमन नम्है उर्मी पाप ती नॊड़ो।

⁸ नम्है नू पाप मलकी ब'अदत होले, नाम नमानिम ठकदत, अरा नाम मानी लगे मल उज्जालदत।

⁹ लिकिन नाम नम्है पाप गुट्ठिन आसिन तेंग्र'ओत होले, आस नम्है पाप गुट्ठिन छमा नना गे, अरा नमन नम्है उर्मी मलदौ ती निमन नना गे पत्त'अना जॊगे अरा पूरेम दौले र'अस।

¹⁰ नाम पाप मल्ला नंजका ब'अदत होले, नाम धर्मेसिन ठकवा ब'अदत, अरा एन्ने ऎद्ददम का आसी कत्था गे नम्है जिया नू अड्डा मलकी।