1 कोरिन्‍थ 8 - पुना गच्छरना NT (BSI)

मूर्ती गे दाँड़े अरगका ओन्ना-मॊख़ना

¹ अक्‍कु मूर्ती गुट्ठी गे दाँड़े अरगका ओन्ना-मॊख़ना ही पत्त नू एंग्‍है ब'अना ईद र'ई का‍ नाम ओर्मत गे इदही पत्त ता लूर र'ई का मूर्ती गुट्ठी गे दाँड़े अरगका ओन्ना-मॊख़नन मॊख़ना पाप मलकी। लूर आलारिन फुल‍ई मन्‍त'ई, लिकिन चोन्‍हा आलारिन कम'ई।

² एकास ऎन उर्मिन अख़दन एन्ने सोचदस होले, मानिम नू आस एकन्ने अख़ना चाड़ र'ई अन्ने अक्‍कु गूटी बलदस।

³ लिकिन ओर्तोस धर्मेसिन चोन्‍हा नन्‍दस होले, आस धर्मेस ती अख़तारदस।

⁴ मूर्ती गुट्ठी गे दाँड़े अरगका ओन्ना-मॊख़नन मॊख़ना ही पत्त नू नाम अख़दत का मूर्ती ख़ॆख़ेल नू एन्‍देर आलॊ हूँ मल्‍ली अरा धर्मेस ओर्तोसिन अम्‍बरकी नन्‍ना नॆ हूँ धर्मे मल्‍दस।

⁵ मेर्ख़ा नू अरा ख़ॆख़ेल नू देंवता गुट्ठी बारना गा र'ई। (एकासे का अजम बग्‍गे देंवता गुट्ठी अरा अजम बग्‍गे उर्बर र'अनर।)

⁶ अन्नु हूँ नमा गे ओन्‍टे लेका धर्मे बंगस र'अस, आस तिम उर्मी गढ़रा, अरा आस गेम नाम उज्‍जा लगदत। अरा नमा गे ओन्‍टे लेका उर्बस र'अस, आस दिम येसु मसीस, आस तरतिम उर्मी गढ़रा, अरा आस तरतिम नाम उज्‍जा लगदत।

⁷ लिकिन उर्मी पत्त'ऊ आलर ई लूरन मल ख़क्‍खियर। जोक्‍क आलर अक्‍कु गूटी मूर्ती गुट्ठिन मानिम आलॊ एन्ने सोचनर। औंगे मूर्ती गुट्ठी गे दाँड़े अरगका ओन्ना-मॊख़नन मॊख़ना बारी, आद मूर्ती गुट्ठी गे दाँड़े अरगका ओन्ना-मॊख़ना एन्ने दिम सोचनर। अरा आर ही लखना इदही पत्त नू फरी मल र'अना चड्डे आद मड़ख़ी क'ई।

⁸ ओन्ना-मॊख़ना नमन धर्मेस गुसन मल अड़सत'ई। नाम इदन मल ओनोत होले हूँ, नमा गे एन्‍द्रा हूँ जुक्‍की मल मनो, अरा अदन ओनोत होले हूँ, नमा गे कोड़हे बॆस मल मनी।

⁹ लिकिन नीम चिहुंक र'आ का, निम्‍है छछिन्‍द पत्त'अना नू पयहा आलारिन पाप नू अम्‍बोर खत्रत'आ।

¹⁰ एकासे का एन्ने लूर र'ऊ आलर नीम मूर्ती ही मन्‍दिर नू ओना गे ओक्‍कनन लखना नू पयहा र'ऊ आलस ऎरदस होले, आस हूँ मूर्ती गुट्ठी गे दाँड़े अरगका ओन्ना-मॊख़नन मॊख़ा गे डिढ मनोस।

¹¹ निम्‍है लूर ही चड्डे जुक्की पत्त'अना र'ऊ भईस मल नठारना र'ई। मसीस आस गे हूँ केच्‍चस।

¹² ई लेक्‍खा निम्‍है भईसी बिड़दो नू पाप नन्‍ना ती इदही पत्त नू फरी मलका आसी लखनन नुंजत'अना ती नीम मसीसी बिड़दो पाप नन्‍दर।

¹³ औंगे ऎन एन्‍द्रन ओन्‍दन-मॊख़दन, आद एंग्‍है पत्त'ऊ भ‍ईसिन पाप नन्‍त'आ गे ननी होले, ऎन एंग्‍है पत्त'ऊ भ‍ईसिन पाप नू मल खत्रत'आ गे अहड़ा कभो मल मॊख़ोन।