1 कोरिन्थ 7 - पुना गच्छरना NT (BSI)बेंज्रना ही पत्त नू मेन्ना 1 “ओर्तोस गे दौ र'ई का आस अम्बोस बेंज्रा” एन्ने मुन्द नीम लिख्रका कत्था ही पत्त नू अक्कु ऎन लिखदन। 2 पेहरन ही सोतरा नलख बग्गे मन्ना ही चड्डे, उर्मी आलस गे तंग्है तंग्है मुक्का र'अना र'ई, अरा उर्मी आली गे तंग्है तंग्है मॆतस र'अना र'ई। 3 अरा मॆतस तंग्है मुक्का ही पेहरन ही चाड़ गुट्ठिन पूरा नन्ना र'ई। अन्नेम मुक्का हूँ तंग्है मॆतासी पेहरन ही चाड़ गुट्ठिन पूरा नन्ना र'ई। 4 मुक्का गे तंग्है मॆद ही अदिया मलकी, मॆतस गा अदही अदिया र'अदस। अन्नेम मॆतस गे तंग्है मॆद ही अदिया मलकी, मुक्का गा अदही अदिया र'ई। 5 नीम ओर्त इरिब नू अमके छिंड्रा। बिन्ती नना गे लेका नीम इरबर ही मने ती जोक्क बेड़ा गे छिंड्रा ओंग्दर। अदही ख़ॊख़ा नीम मेस्रका र'आ, ख़ने सैतान निमा सह'आ पोलना चड्डे निमन चिबाख़ारना नू अम्बो टिड़'आ। 6 लिकिन ऎन इबड़न पॆसका बेसे मला सलहा बेसे ब'अदन। 7 ओर्मा आलर हूँ गा एंग्है लेक्खा डिंडा र'आ गे ऎन बेद्ददन। लिकिन धर्मेस तरती ओर्मर गे मुध इनाम ख़क्ख्रकी र'ई। ईद ओर्तोस ओन बेसे नन्नस गे नन्ना बेसे र'ई। 8 बिगर बेंज्रकर अरा रड़ियाहिर ही पत्त नू एंग्है ब'अना ईद र'ई का आर गे एंग्है लेक्खा बिगर बेंज्रका र'अना दौ र'ई। 9 लिकिन आर तंगन सह'आ पोल्लोर होले बेंज्रनर नेकअन, एन्देरगेका पेहरन ही चिबाख़ारना ती ऒलना ती बेंज्रना दौ हवे। 10 नॆ बेंज्रका र'अनर, आरिन ऎन पॆसदन। ईद एंग्है ती मला लिकिन धर्मेस तरती र'ई का मुक्का तंग्है मॆतस ती अम्बो अम्बर'आ। 11 (लिकिन आद अन्ने ननो होले, आद बिगर बेंज्रकम र'अना र'ई महले तंग्है मॆतस गने फेन मेसर नखरना र'ई।) अरा मॆतस तंग्है मुक्कन अम्बोस अम्बा। 12 नन्नर ही पत्त नू उर्बस मला ऎनिम एन्ने ब'अदन का, ओर्त पत्त'ऊ आलासी मुक्का मल पत्त'ऊ आली र'ई, अरा आद आस गने र'आ गे पत्तार'ई होले, आस अदिन अम्बोस अम्बा। 13 अन्नेम ओर्त पत्त'ऊ आली ही मॆतस मल पत्त'ऊ आलस र'अदस, अरा आस अदही गने र'आ गे पत्तारदस होले, आद आसिन अम्बो अम्बा। 14 एन्देरगेका मल पत्त'ऊ मॆतस तंग्है मुक्का चड्डे धर्मेसी मया ही तबे नू बरदस, अरा एन्ने मल पत्त'ऊ मुक्का तंग्है मॆतस चड्डे धर्मेसी मया ही तबे नू बर'ई। मला होले निम्है ख़द्द-ख़र्रर धर्मेसी मया ही गेच्छा र'ओर दने, लिकिन अक्कु गा आर नेम्हा र'अनर। 15 लिकिन मल पत्त'ऊ मॆतस महले मुक्का अम्बर नख्रनर बेद्दनर होले, अम्बरनर नेकअन। एन्ने दसा नू पत्त'ऊ मॆतस महले मुक्का बेंज्रका ही हॆंरका नू र'आ गे चाड़ मलकी, एन्देरगेका धर्मेस नमन सान्ति ती उज्जा गे मीख़कादस। 16 अना मुक्कायो, नीन सुरता नन्ना र'ई का नीन निंग्है मॆतासी नाड़रना ही चड्डे मना उंगदी। अना मॆतायो, नीन सुरता नन्ना र'ई का नीन निंग्है मुक्का ही नाड़रना ही चड्डे मना ओंग्दय। 17 औंगे ओर्त ओर्त गे उर्बस तंग्है उज्जना नू ओकताचका लेक्खा, अरा धर्मेस तंगन मॆख़्रका मॆख़ना लेक्खा दिम तंग्है उज्जनन चलाब'अना र'ई। ऎन उर्मी कलीसिया गे एन्नेम नॆग चि'अदन। 18 नीकईम तान पत्त'ऊ मंजका ही मुन्द खतना मंजका आलस रहचस होले, आस खतना मल मंजका लेक्खा मना गे चिहुट मल नन्ना र'ई। अरा नेकईम पत्त'ऊ मंजका ही मुन्द खतना मल मंजका आलस रहचस होले, आस खतना मन्ना ही चाड़ मल्ला। 19 खतना मंजका ही हूँ, अरा खतना मल मंजका ही हूँ एन्देर हूँ मॊल मल्ला। धर्मेसी पॆसकन पॆस्रना दिम मॊल र'ई। 20 ओर्त ओर्त आलस एका लेक्खा धर्मेस ती मॆख़्रकादस आ लेक्खम ठिमठिम ने र'अदस नेकअन। 21 नीन बिट्ठी ननू जॊंख़ लेक्खा मॆख़्रकादय होले, अदही पत्त नू अमा घोख'आ, लिकिन निंगा अम्ब्र'आ गे बेड़ा ख़क्ख्र'ओ होले, अम्ब्रनन इंझ्र'आ हो'आ। 22 एन्देरगेका ओर्तस उर्बासी मॆख़ना बेड़ा नू बिट्ठी ननू जॊंख़ रहचस होले, आस उर्बस नू छछिन्द आल मन्दस। अन्नेम ओर्तस उर्बासी मॆख़ना बेड़ा नू छछिन्द रहचस होले, आस मसीसी बिट्ठी ननू जॊंख़ मन्दस। 23 नीम कोड़हे दाम चि'अरकी ख़ॆन्द्रकादर, औंगे आलर ही बिट्ठी ननू जॊंख़ अमा मना। 24 अना भईरो, ओर्त ओर्त नीम एका दसा नू धर्मेस ती मॆख़्रकाचकर, आ दसा नुम धर्मेस गने ठिमठिम ने र'अन नेकअन। 25 अक्कु डिंडा कुक्केर ही पत्त नू एंगा उर्बस ती एन्देर पॆसका हूँ मल्ला ख़क्ख्रका। लिकिन ऎन पत्त'अना जॊगे मना गे उर्बासी सोग्गे ती एंग्है सलहा चि'अदन। 26 ऎन एन्ने सोचदन का इन्नेला ता कलपारना ही चड्डे आलस एकन्ने र'अदस अन्नेम र'अना दौ र'ई। 27 नीन बेंज्रकादय होले, निंग्है मुक्कन अम्बा गे चिहुट अमके नना। अरा नीन मल्ला बेंज्रका होले, मुक्का बेद्दना ही चिहुट नू अमके र'आ। 28 लिकिन नीन बेंज्रदय होले, नीन पाप मल नन्दय, अरा डिंडा कुक्के बिंज्र'ई होले, आद पाप मल ननी। लिकिन एकार बेंज्रनर आर ई उज्जना नू बग्गे सस्ती मनोर। इबड़ा ती ऎन निमन ख़ापा बेद्ददन। 29 लिकिन भईरो! ऎन निमन एन्देर ब'अदन का बेड़ा गा जुक्की र'ई। औंगे अक्कु ती नॆ बेंज्रकानर, आर मल्ला बेंज्रका लेक्खा उज्जनर नेकअन। 30 अरा नॆ चींख़नर, आर मल चींख़ना लेक्खा र'अन नेकअन। अरा नॆ रिरयरनर, आर मल रिरयारना लेक्खा र'अन नेकअन। अरा नॆ एन्दरन ख़ीन्दू आलर र'अनर, आर आद तमा मल्ला बेसे र'अन नेकअन। 31 अरा नॆ ई ख़ॆख़ेलन ता जिनिसन बउरारनर, आर अबड़ा ही गने बग्गे पत्तार'ऊ मल मन्ना र'ई। एन्देरगेका ई ख़ॆख़ेल बग्गे उल्ला गूटी मल र'ओ। 32 ऎन बेद्ददन का निमा इन्द्रिइम फिकिर अम्बो मना। नॆ मल्ला बेंज्रका, आस उर्बासिन एकासे रिझाब'ओन ब'अरकी उर्बासी पत्त नू लेका फिकिर नन्दस। 33 लिकिन बेंज्रका आलस तंग्है मुक्कन एकासे रिझाब'ओन ब'अरकी आस ई ख़ॆख़ेल ता कत्था नू फिकिर नन्दस। 34 अरा आसी मने ऎंड़ भाग मनी। अन्नेम मल बेंज्रका आली महले डिंडा कुक्के तंग्है मॆद अरा बॊलता दुयो नू नेम्हा मना गे उर्बासी पत्त ता कत्था नू लेका फिकिर ननी। लिकिन बेंज्रका आली तंग्है मॆतासिन एकासे रिझाब'ओन ब'अरकी आद ई ख़ॆख़ेल ता कत्था नू फिकिर ननी। 35 ऎन इदन निमन अड़झ'आ गे मल ब'अदन, लिकिन नीम ओन्टा मन मंजका ती उर्बासी सुसर नू बोथ्रका र'आ गे निमा दौ गे दिम इदन ब'अदन। 36 अरा नेकईम तंगा गे ठनचका डिंडा पेल्लो गने तान मलदौ नना ओंग्दन एन्ने एल्चदस, अरा अदही उम्मर खसलार'आ लगी एन्ने सोचदस होले, आस तंग्है मने लेक्खा अदिन बेंज्रा ओंग्दस। आद पाप मल्ली। आर बेंज्रनर नेकअन। 37 अन्नु हूँ नेकईम बेंजा ही चाड़ मल्ला एन्ने तंग्है जिया नू पखड़ र'अस ती तंग्है मॆद ही चिबाख़ारना आबोन तंग्है आकुस नू उइय्यू र'अस ती डिंडा पेल्लोन मल बेंज्रोन ब'अरकी ठनचका र'अदस होले, आस हूँ ठौकम नन्दस। 38 औंगे एकास डिंडा पेल्लोन बेंज्रदस, आस दौ नन्दस। लिकिन एकास अदिन मल बेंज्रदस, आस बॆस दौ नन्दस। 39 मुक्का एका गूटी तंग मॆतस उज्जालदस आ गूटी आद आस ती हींरकी र'ई। लिकिन अदही मॆतस खे'अदस होले, आद उर्बस नू र'ऊ नॆकानिम तंग्है मने लेक्खा बेंज्र'आ उंगी। 40 अन्नु हूँ एंग्है सलहा ईद र'ई का, आद बिगर बेंज्रका ती अन्नेम रही क'ओ होले, आद कोड़हे बरकत ख़क्खू आली र'ई। ऎन पत्त'अदन का धर्मेसी बॊलता एंग्है मइय्याँ र'ई। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India