1 कोरिन्थ 16 - पुना गच्छरना NT (BSI)नेम्हा आलर गे बरार 1 अक्कु येरुसलॆम ता नेम्हा आलर गे ख़ॊजना बरार ही पत्त नू एंग्है ब'अना ईद र'ई का, गलातिया जिला ता कलीसिया गुट्ठी गे नना गे ऎन एन्देर पॆसकादन, अदन नीम हूँ नना। 2 उर्मी हप्ता ही पहिल उल्ला नीम ओर्त ओर्त तंग्है अर्जाचका ती जोक्को भिने उइय्के, अरा अदन सैत'आ। औंगे ऎन बरना बेड़ा नू दान ख़ॊजना ही चाड़ मल मनो। 3 एकाबारी ऎन अइय्या बर'ओन ख़ने, नीम नॆकन बेद्ददर आर गे चिठी चि'ओन ती तइय्योन का आर निम्है बरार आबोन येरुसलॆम अंड़सत'ओर। 4 अरा एंगा काना चाड़ मनो होले हूँ, आर एंग्है गने क'ओर। पौलुसी छेद्दे तिगाब'अना 5 ऎन मकेदोनिया जिला मन्नुम निम्है गुसन बर'ओन, एन्देरगेका एंगा गे मकेदोनिया मन्नुम ती कानम र'ई। 6 अरा मना ओंगाली का ऎन जोक्क उल्ला निम्है गुसन र'ओन महले पइय्याँ उल्लन हूँ पहाब'ओन। औंगे इदही ख़ॊख़ा एंगा एस'आनिम काना मनो होले हूँ, नीम एंग्है डहरे ऎकना गे संगरा नना ओंग्दर। 7 अक्कु डहरे ऎकनुम ऎन निमन भेंटार'आ मल बेद्ददन, अन्नु हूँ ऎन असरा नन्दन का, उर्बासी मने मनो होले, ऎन जोक्क उल्ला निम्है गुसन पहाब'ओन। 8 लिकिन ऎन पेन्तॆकोस्तॆ उल्ला गूटी इफेसुस नगरे नू र'ओन। 9 एन्देरगेका एंगा गे इसन ओन्टा कोड़हे नलख गे ओन्टा कोहाँ बली तिसगिरकी र'ई, लिकिन अइय्या छेंका ओरदू आलर हूँ बग्गेर र'अनर। 10 तीमोथियुस निम्है गुसन बर'ओस होले, आस निम्है मझी नू र'ओ बारी बिगर एल्चका ती र'आ गे तिहा ननके। एन्देरगेका आस एंग्है लेक्खम उर्बासी नलख नन्दस। 11 औंगे नॆ हूँ आसिन सन्नी अमके अख़'आ। लिकिन आस एंग्है गुसन किर्रा गे आसिन कोड़े गने इसन तइय्के चि'अके। एन्देरगेका आस भइय्योर गने बर'आ गे ऎन आसिन पाब ऎरदन। 12 अक्कुन नम्है भइय्योस अप्पोल्लॊसी पत्त नू, ऎन आसिन निम्है गुसन भइय्योर गने काला गे नगदे रिझाबाचकन। अक्कु आस काला गे मल बिद्दियस, लिकिन मोका ख़क्खोस ख़ने आस बर'ओस। 13 नीम एज्रका र'आ, अरा पत्त'अना नू ठिमठिम ने र'आ, अरा डिढ नना, अरा बड़ियर मना। 14 नीम एन्देर एन्देर नन्दर उर्मिन चोन्हा ती नना। 15 अना भईरो! नीम स्तेफनासी एड़पातारिन अख़दर, आर अख़ाया चक नू मसीसिन इंझ्रका पहिल आलर हिकनर। अरा आर नेम्हा आलर ही तेतर सुसर गे तमन चिच्का र'अनर। औंगे ऎन निमन ने'अदन का, 16 एन्ने आलर ही तबे नू र'आ, अरा ई नलख नू संगे मनरकी उर्बस येसुस गे नलख नन्नर आर ओर्मर ही तबे नू र'आ। 17 अरा ऎन स्तेफनास अरा फोरतुनातुस अरा अख़य्कोसी बरना ती खुसमारदन, एन्देरगेका आर निम्है मल रहचका ही खंगतिन पूरा नंजर। 18 अरा आर निम्है बॊलतन एकासे रिझाबाचर अन्नेम एंग्है बॊलतन रिझाबाचर। ई बेसे आलारिन मान चि'आ। छेद्दे मोंजरा 19 आसिया जिला ता कलीसिया गुट्ठी निमन मोंजरा नन्नर। अकुलास अरा प्रिसका अरा आर ही एड़पा नू ओक्कना कलीसिया निमन उर्बस नू कोड़हे मोंजरा नन्नर। 20 इय्या ता ओर्मा पत्त'ऊ आलर निमन मोंजरा नन्नर। ओर्त ओर्तोरिन नेम्हा चोंखना ती मोंजरा नना। 21 ऎन पौलुस ई मोंजरन एंग्है ख़ेक्खा ती लिखदन। 22 नेकईम उर्बासिन चोन्हा मल नन्दस होले, धर्मेस आस गे दंडे चि'अदस नेकअन। एम्है उर्बायो बरा। 23 उर्बा येसुसी मया निम्है गने र'अन नेकअन। 24 मसी येसुस नू र'अनर नीम ओर्मर गने एंग्है चोन्हा र'अन नेकअन। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India