1 कोरिन्थ 13 - पुना गच्छरना NT (BSI)चोन्हा 1 ऎन आलर ही भखा गुट्ठिन अरा मेर्ख़ा पैकर ही भखा गुट्ठिन कछनख्रदन, लिकिन एंग्है नू चोन्हा मलकी होले, ऎन ठिंन ठिंनरना पितल अरा झनझनरना झाँझ लेका हिकदन। 2 ऎन धर्मेसी कत्थन मुन्द तिंगू आलन, अरा उर्मी नूख़्रका ही गम्मन अरा उर्मी लूरन अख़ना ही सवंग र'ऊ आलन, अरा परता गुट्ठिन हूँ गुछाब'अना ही कोड़हे बड़ियर पत्त'अना र'ऊ आलन, अन्नु हूँ एंग्है नू चोन्हा मलकी होले, ऎन एन्देर हूँ मलकन। 3 अरा ऎन एंग्है उर्मी खुर्जिन कीड़र गे चि'अदन, अरा एंग्है मॆदन बस्सा गे चि'अदन, लिकिन एंग्है नू चोन्हा मलकी होले, इत्रु एंगा एन्द्रा हूँ नफा मल्ला। 4 चोन्हा सह'ऊ अरा सोग्गे ईरू र'ई। चोन्हा इस्गहा मल ननी, चोन्हा फुलई मल ननी, अरा मल इतरार'ई। 5 चोन्हा मल सोभना कत्था मल ननी, अरा आद तंगा दौ गे मल बिद्दी, अरा आद मल बरमार'ई, अरा आद नन्नर तंगा गे नंजका मलदौ ही लेखा मल उइय्यी। 6 चोन्हा उजगो मलका नू मल रिझ्र'ई, लिकिन मानी नू रिझ्र'ई। 7 चोन्हा उर्मी कत्थन सह'ई, अरा उर्मी कत्थन पत्त'ई, अरा उर्मी कत्था नू असरा उइय्यी, अरा उर्मी कत्था नू सहनुम चिहुट ननी। 8 चोन्हा इकला हूँ मल मुंजुर'ओ। लिकिन धर्मेसी कत्थन मुन्द तेंगना मुंज्र'ओ कालो, अरा कैनो मदहे बलना भखा गुट्ठिन कछनख्रना मॊखोर'ओ क'ओ, अरा लूर मुंज्र'ओ। 9 एन्देरगेका नम्है लूर दरबंड़या र'ई, अरा नम्है धर्मेसी कत्थन मुन्द तेंगना दरबंड़या र'ई। 10 लिकिन एकाबारी पूरचख़च्च'ऊ अंड़सो ख़ने, दरबंड़या मुंज्र'ओ। 11 ऎन ख़द्द रहचकन ख़ने, ओन्टा ख़द्द लेक्खा कछनख्रकन, अरा ओन्टा ख़द्द लेक्खा सोचकन, अरा ओन्टा ख़द्द लेक्खा बुझ्रकन। लिकिन ऎन परदकन ती आल मंजकन ख़ने, ऎन ख़द्दबुधिया कत्थन अम्बकन चिच्कन। 12 अक्कु गा नाम मड़ख़का ऐना नू धुमलहा ऎरना बेसे धर्मेसिन बड़ियर मल ऎरदत, लिकिन ख़ॊख़ा नाम उर्मी कत्थन बड़ियर फरीफरी ऎरोत। अक्कुन ऎन जुक्किम दिम अख़दन, लिकिन ख़ॊख़ा धर्मेस एंगन एकासे बनेम अख़दस अन्नेम ऎन उर्मिन बनेम अख़'ओन। 13 अक्कु गा पत्त'अना, असरा, अरा चोन्हा इबड़ा तीनो उर्मी उल्ला बन्चकी र'ओ, लिकिन इबड़ा ती चोन्हा दिम कोहाँ र'ई। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India