Zebûr 85 - Kurmanji Încîl

Zebûr 85

Zebûra kurên Korah

¹ Ya Xudan, tu ji diyarê xwe razî mayî, Te Aqûb ji surgûnê bi şûn ve anî.

² Te gunehê gelê xwe bexişand, Hemû sûcên wan nuxumand.

³ Te, hemû xezeba xwe da alî, Dev ji kela hêrsa xwe berda.

⁴ Ey Xwedayê rizgariya me, me bizivirîne, Hêrsa xwe ya li hember me daxîne!

⁵ Ma tê her û her hêrs bibî li me? Û hêrsa te bajo li hember hemû nifşên me?

⁶ Da ku gelê te bi te şa be, Tê me cardin nevejînî?

⁷ Ya Xudan kerema xwe nîşan bide me, Rizgarkirina xwe bide me!

⁸ Xwedê Xudan çi bêje ezê gohdar bim; Ewê ji gelê xwe û dilsozên xwe re aştiyê bêje, Da ku ew, cardin venegerin bêaqiliyê.

⁹ Rizgarkirina wî, nêzikî wan e ku ji wî ditirsin, Da ku keremê li diyarê me bide rûniştin.

¹⁰ Wê hezkirin û kerem bigihîjin hev, Aştî û rastdarî, ramûsin hev.

¹¹ Wê rastî li erdê şîn bibe, Rastdarî ji jor ve binêre.

¹² Wê Xudan ya qenc bide, Û axa me berê xwe bide.

¹³ Wê rastdarî li pêş wî bimeşe, Û ji gavên wî re rê çêke.