Zebûr 57 - Kurmanji Încîl

Zebûr 57

Gava ji Sawil reviyabû şikevtê

¹ Li min were rehmê ey Xwedê, li min were rehmê, Çimkî min xwe avêt te; Heta ku bela derbas bin, Ezê xwe bavêjim bin siya bazkê te.

² Ez bangî Xwedê, Yê Herî Berz dikim, Ew Xwedê ku, her tiştî ji bo min dike.

³ Wê ji ezmanan bişîne û min azad ke, Yên ku dixwazin min daqurtînin şermî ke, Wê kerem û dilovaniya xwe bişîne.

⁴ Canê min di nav şêran de ye, Di nav zilamên ku dişewitînin de ez radizêm, Diranên wan wek rim û wek tîr in, Zimanê wan şûrê tûj.

⁵ Ey Xwedê, li ser ezmanan bilind be, Bila berziya te li ser tevahiya erdê be!

⁶ Tor avêtin gavên min, Pelişî canê min; Li pêş min çal vedan, Ew bi xwe ketinê.

⁷ Dilê min bêleq e, ey Xwedê, dilê min bêleq e, Ezê lavij û îlahiyan bêjim.

⁸ Hişyar be ey canê min, hişyar be, Hişyar be ey ribab, ey çeng, Ezê, seherê hişyar kim!

⁹ Di nav miletan de ez spasî bidim te, ey Xudan, Di nav netewan de ji te re lavijan bêjim.

¹⁰ Çimkî kerema te heta ezmanan, Rastiya te mezin e bi qasî asîmanan.

¹¹ Ey Xwedê, bilind bibe li ser ezmanan, Bila berziya te li ser tevahiya erdê be.