Zebûr 43 - Kurmanji Încîl

Zebûr 43

¹ Li doza min binêre ey Xwedê, Min biparêze li hember bêwefayan, Azad ke, ji hîlekar û neheqan.

² Çimkî tu Xwedayê min, tu stara min î; Te çima ez avêtim? Çima ezê di bin zora dijminên xwe de, Şîndar bigerim?

³ Tu ronahiya xwe, rastiya xwe bişîne, Bila ji min re bibe rêber, Min bibin çiyayê te yê pîroz û warê te.

⁴ Hingê ezê herim gorîgeha Xwedê, Bi şahî biçim ba kaniya dilgeşiya xwe Xwedê, Û ji te re ey Xwedê, Xwedayê min, Bi çengê spas bikim.

⁵ Tu çima xemgîn î ey canê min, Bo çi dinalî hundirê min? Hêviya xwe bi Xwedê ve girêde, Çimkî ezê dîsa jê re spas bikim; Ew e rizgarkar û Xwedayê min.