Zebûr 15 - Kurmanji Încîl

Zebûr 15

Zebûra Dawid

¹ Ya Xudan, kî wê bibe mêvan li konê te? Kî wê rûnê li çiyayê te yê pîroz?

² Yên ku bêkêmahî dijîn, ya rast dikin, Û ji dil ya rast dibêjin.

³ Ew ku, bi zimanên xwe nakin buxtan, Xerabî nakin bi dostan, Ruswa nakin cîranan.

⁴ Ew ku, zilamên rezîl kêm dibînin, Belê yên ku ji Xudan ditirsin dihesibînin. Bi xesara xwe sond xwaribe jî, venagere ji sondê.

⁵ Perê xwe nade faîzê, Li hember bêsûc bertîlê nastîne. Yê ku vana dike wê tu car veneleqe.