Zebûr 149 - Kurmanji Încîl

Zebûr 149

¹ Pesnê Xudan bidin! Lavijeke nû ji Xudan re bêjin, Di civata dilsozên wî de, Bi lavijan pesnê wî bidin!

² Bila Îsraêl bi afirandarê xwe şa be, Bila gelê Sîyonê bi padîşahê xwe dilgeş be!

³ Bila bi reqisînê pesnê navê wî bidin, Bila bi tef û bi çengê jê re bistirin!

⁴ Çimkî Xudan ji gelê xwe razî ye, Ew nefsbiçûkan bi taca serketinê dixemlîne.

⁵ Bila dilsozên wî bi berzî û bi şahî kêf bikin, Bila li ser nivînên xwe bi şahî bistirin!

⁶ Pezindana Xwedê di devê wan de, Şûrê du devî di destê wan de,

⁷ Da ku ji miletan heyfê bistînin, Û gelan ceza bikin,

⁸ Padîşahên wan bi zincîran, Pêşewayên wan bi lelên hesin girê din!

⁹ Da ku, biryara nivîsandî di nav wan de rêve bibin! Ev, şerefa hemû dilsozên wî ye. Pesnê Xudan bidin!