Zebûr 148 - Kurmanji Încîl

Zebûr 148

¹ Pesnê Xudan bidin! Ji ezmanan pesnê Xudan bidin, Ji berziyan pesnê wî bidin!

² Ey hemû milyaketên wî, pesnê wî bidin, Ey hemû ordiyên wî, pesnê wî bidin!

³ Ey roj û hîv, pesnê wî bidin, Ey hemû stêrên birqok, pesnê wî bidin!

⁴ Ey ezmanên ezmanan, Û avên li ser ezmanan, Pesnê wî bidin!

⁵ Bila ew pesnê navê Xudan bidin, Çimkî wî emir da û ew hatin afirandin;

⁶ Wî ew ji bo her û her, li cihê wan da rûniştandin, Qanûnen ku danî, nayên betalkirin.

⁷ Ji ser rûyê erdê pesnê Xudan bidin, Ey hûtên deryayê û hemû kûrahî,

⁸ Agir û zîpik û berf û ewr, Bahozên ku bi fermana wî dikin,

⁹ Çiya û hemû mil, Darên meywan û darên sediran,

¹⁰ Heywanên kûvî û dewar, Yên ku li erdê dişêlin, çûkên ku difirin,

¹¹ Padîşahên dinê û hemû gel, Serok û serwerên hemû dinê,

¹² Xortên mêrxas û keç, Yên pîr û zarok!

¹³ Bila pesnê navê Xudan bidin, Çimkî tenê navê wî berz e. Berziya wî di ser erd û ezman re ye.

¹⁴ Wî ji bo gelê xwe serokek rakir, Pesnê hemû dilsozên wî, Û gelê Îsraêlê yê ku nêzikî wî ye bidin, Pesnê Xudan bidin.