Zebûr 14 - Kurmanji Încîl

Zebûr 14

Zebûra Dawid

¹ Yê bêaqil di dilê xwe de, «Xwedê tune» dibêje. Mirov xera bûn, karê xerab serî hildan û çûn. Nema kesî qencîker.

² Xudan ji jor ve li mirovan dimeyzîne, Ka gelo ewê yên şehreza û li Xwedê digerin bibîne.

³ Hemû ji rê derketin, Bi hev re bûn mirdar. Kesî qencîker tune, Tenê yek nîne.

⁴ Ma yên ku sûc dikin nabînin? Wek ku nan bixwin, gelê min dixwin. Û bang nakin Xudan.

⁵ Li wir wê bitirsin, bikevin sawan. Çimkî li alî kesên rast e Xudan.

⁶ Hûn biçûk dibînin şîreta bindestan, Belê wan xwe spartiye Xudan.

⁷ Xwezî xelasiya Îsraêlê ji Siyonê bihata! Gava ku Xudan xelqê xwe ji surgûnê bîne, Wê ji Aqûb re şadî, ji Îsraêl ê re dilşadî bîne.