Zebûr 122 - Kurmanji Încîl

Zebûr 122

Lavija Hecê ya Dawid

¹ Gava ji min re dibêjin, «Em herin mala Xudan» Ez şa dibim.

² Lingên me li ber derên te disekinin, Ey Orşelîm!

³ Orşelîm ku, Wek bajarek bi pergal û bi aheng hatiye avakirin!

⁴ Eşîrên wî derdikevin wê derê, eşîrên Xudan, Li gor rêznama ku ji Îsraêlê re hatiye dayin, Sipasî bidin navê Xudan.

⁵ Çimkî li wê derê textên dadbarkirinê, Textên mala Dawid hatine danîn.

⁶ Ji bo Orşelîmê aştiyê bixwazin: «Yên ku ji te hez dikin, bila di rihetiyê de bin!

⁷ Bila di nav sûrên te de aştî hebe, Qesrên te di nav aştiyê de bin!»

⁸ Ji bo xatirê bira û hevalên xwe, Ezê bêjim, «Aştî li ser te!»

⁹ Ji bo xatirê mala Xudanê me Xwedê, Ezê qenciya te bixwazim.