Zebûr 1 - Kurmanji Încîl

KITÊBA I Zebûr 1

¹ Xwezî bi wî mirovê ku bi şîreta xeraban rêve naçe, Bi pey gunehkaran nakeve, Li komela tinazkaran rûnanê.

² Ew tenê zewqa xwe ji şerîeta Xudan distîne, Û bi şev û bi roj kûr li ser wê difikire.

³ Yên weha wek wê darê ne, ku li lêva avê hatiye danîn, Meywa xwe di demê de dide, Pelê wê naçilmise. Her karê ku dike qenc dike.

⁴ Xerab ne weha ne, Wek hûrikê kayê ne ku ba lê dixe û dibe.

⁵ Loma di dadbarkirinê de rast dernakevin, Û gunehkar li civata qencan ranawestin.

⁶ Çimkî Xudan riya qencan dizane, Belê riya xeraban neman e.