Yoêl 1 - Kurmanji Încîl

¹ Gotina Xudan a ku ji Yoêlê kurê Petûêl re hat, ev e.

Şîna li ser êrîşa kuliyan

² Rîspîno, bibihîzin! Hemû şêniyên welêt, guh bidin! Gelo di dema we yan dema bav û kalên we de Tiştekî wiha qewimiye?

³ Vê yekê ji zarokên xwe re bêjin. Bila zarokên we ji zarokên xwe re, Ew jî, ji nifşê bê re bêjin.

⁴ Tişta ji ber kuliyan ma, kuliyên din xwar, Tişta ji ber wan ma, koma sisêyan xwar Û tişta ji ber wan jî ma koma çaran xwar.

⁵ Serxweşno, hişyar bin û bigirîn! Şerabvexwarno, ji bo şeraba şîrîn bizarin! Çimkî ji ser devê we hatiye hildan.

⁶ Çimkî miletekî hêzdar ê ku nayê hejmartin Bi ser welatê min ve hat. Diranê wî diranê şêran e, Erçena şêremê pê re ye.

⁷ Wî mêwên min xera kir, Darhejîrên min kirin sîx, Qalikên wan qeşartin û avêtin erdê. Çiqlên wan fîqspî bûn.

⁸ Wekî keçika destgirtiyê wê mirî ye, Çûx li xwe dike û reş girê dide!

⁹ Pêşkêşiyên dexlê û rijandinê, Ji Mala Xudan hat birîn. Kahin û xizmetkarên Xudan şînê dikin.

¹⁰ Zevî xera bû, ax şînê dike. Çimkî dexil xera bû, Şeraba nû çikiya Û rûnê zeytê hat birîn.

¹¹ Cotkarno, ji bo ceh û genim, Li xwe bixin! Rezvanno, bizarin! Çimkî berê zeviyan helak bû.

¹² Mêw hişk bûn, darhejîr çilmisîn. Hemû darên fêkiyan; hinar, xurme û sêv jî hişk bûn. Şahiya mirovan jî miçiqî.

Gaziya tobekirinê

¹³ Kahinno, çûxê li xwe bikin! Xizmetkarên gorîgehê bizarin! Xizmetkarên Xudan werin Û di nav çûxê de şevê biborînin! Çimkî pêşkêşiyên dexlê û rijandinê, Ji Mala Xwedayê we hatin texsîrkirin.

¹⁴ Dema rojiyê diyar bikin, Civîneke mezin kifş bikin. Rîspî û hemû şêniyên welêt, Li Mala Xwedayê xwe Xudan bicivînin Û ji Xudan re bikin hewar.

¹⁵ Ax ew roj! Çimkî Roja Xudan nêzîk e, Wekî hilweşîna Karîndar tê.

¹⁶ Ma xwarina me li ber çavê me, Kêf û şahiya Mala Xwedayê me nehat birîn?

¹⁷ Tov di bin terkên erdê de riziyan, Embar wêran bûn û kulîn hilweşiyan, Çimkî dexil nema.

¹⁸ Ka binêrin heywan çawa dinalin! Keriyên dewaran bêçare digerin. Çimkî mêrga wan tuneye, Keriyên pêz perîşan bûn.

¹⁹ Ya Xudan, ez li te dikim hewar, Çimkî êgir mêrgên çolê daqurtandin Û pêta êgir hemû darên zeviyan şewitandin.

²⁰ Heywanên çolê jî bi hilkehilk gazî te dikin, Çimkî kanî ziwa bûn Û êgir mêrgên çolê daqurtandin.