Yêşû 23 - Kurmanji Încîl

Xatirxwestina Yêşûyê Pêxember

¹ Piştî demeke dirêj, piştî ku Xudan ji dijminên derdora wan aramî dabû gelê Îsraêl, Yêşû kal bûbû û bi salan ve çûbû.

² Wî hemû Îsraêlî, rîspî, peywirdar, dadger û rêberên wan civandin û ji wan re got: “Ez pîr bûme û bi salan ve çûme.

³ We dît ku Xwedayê we Xudan ji bo xatirê we çi anî serê tevahiya van miletan. Çimkî Yê ku ji bo we şer dikir Xwedayê we Xudan bû.

⁴ Va ye min axa van miletên mayî û axa hemû miletên hatibûn qewitandin ku ji Çemê Şerîayê ber bi rojava ve heta Derya Spî rûdiniştin bi milkî dan eşîrên we.

⁵ Wê Xwedayê we Xudan van miletan ji ber we bavêje û biqewitîne. Çawa Xwedayê we Xudan ji we re got, hûnê axa wan ji xwe re bikin milk.

⁶ Loma gelekî hêzdar bin ku hemû tiştên di Nivîsa Şerîeta Mûsa de hatiye nivîsandin pêk bînin. Jê ber bi milê çep û rastê ve averê nebin.

⁷ Bi miletên di nav we de dimînin re tevlihev nebin. Navên îlahên wan hilnedin û bi wan sond nexwin. Xulamiya wan nekin û li ber wan neçin ser çokan.

⁸ Lê çawa ku we heta îro kiriye, bi Xwedayê xwe Xudan ve girêdayî bimînin.

⁹ Çimkî Xudan li ber we miletên mezin û hêzdar qewitandin û tu kes heta îro li pêşberî we nesekiniye.

¹⁰ Çawa ku wî ji we re got, wê Xwedayê we Xudan ji bo we şer bike û wê yek ji we hezar kesan biqewitîne.

¹¹ Baş hay ji xwe hebin ku hûn ji Xwedayê xwe Xudan hez bikin.

¹² Heke hûn pişta xwe bidin wî, bi van miletên di nav we de dimînin re bibin yek, bi wan re merivatiyê bikin, ew tev li we bibin û hûn tev li wan bibin,

¹³ wê gavê baş bizanibin wê Xwedayê we Xudan ji pêş we van miletan neqewitîne û heta ku hûn li ser vî welatê qenc ê ku Xwedayê we Xudan daye we tune bibin, wê ev milet ji bo we bibin dafik, xefik, zixtê li ser pişta we û kelemê nav çavê we.

¹⁴ “Niha ez diçim wê riya ku hemû dinya diçê. Hûn hemû jî bi hemû dilê xwe û bi hemû canê xwe dizanin ku ji hemû tiştên baş ên ku Xwedayê we Xudan li ser we got, tu tişt jî vala derneket. Hemû jî pêk hatin, tiştekî vala derneket.

¹⁵ Lê çawa ku hemû tiştên baş ên ku Xwedayê we Xudan li ser we got pêk hatin, dibe ku wisa jî Xwedayê we Xudan li ser vî welatê qenc ê ku daye we heta we tune bike, hemû tiştên xerab bîne serê we.

¹⁶ Heke hûn peymana ku Xwedayê we Xudan li we emir kiriye binpê bikin, herin xulamiya îlahan bikin û li ber wan herin ser çokan, wê hêrsa Xudan li dijî we rabe û hûnê yekser li ser vî welatê qenc ê ku daye we tune bibin.”