Yêşû 19 - Kurmanji Încîl

Mîrasa eşîra Şimûn

¹ Pişka diduyan li binemalên Şimûniyan ket. Mîrasa wan di nav axa Cihûdayiyan de bû.

² Di mîrasa wan de ev hebûn: Beêr-Şeva –ku Şeva ye– Molada,

³ Hasar-Şûel, Bala, Esem,

⁴ Êltolad, Betûl, Horma,

⁵ Zîqlag, Bêtmarkavot, Hasar-Sûsa,

⁶ Bêtlevaot û Şarûhen; bi gundên xwe ve sêzdeh bajar.

⁷ Eyîn, Rîmmon, Eter û Eşan; bi gundên xwe ve çar bajar,

⁸ herwiha hemû gundên li dora van bajaran, heta Baalat-Beêrê –ku Ramat-Negev e. Mîrasa binemalên Şimûniyan ev bû.

⁹ Ji ber ku axa Cihûdayiyan ji bo wan zêde bû, mîrasa Şimûniyan di nav axa Cihûdayiyan bû. Bi vî awayî Şimûniyan parek ji axa wan stand.

Mîrasa eşîra Zevûlon

¹⁰ Pişka sisêyan li binemalên Zevûloniyan ket. Sînorê mîrasa wan digihîşt Sarîdê.

¹¹ Ji wir, sînorê wan ber bi aliyê rojava ve diçû Marelayê, digihîşt Dabbeşetê û geliyê pêşberî Yoqneamê.

¹² Ji Sarîdê ber bi aliyê din ve jî, ber bi rojhilat ve heta sînorê Kîslot-Tavorê diçû, digihîşt Daveratê û dirêjî Yafîayê dibû.

¹³ Ji wir, bi aliyê rojhilat ve berdewam dikir, diçû Gat-Hêfer, Êt-Qasînê û Rîmmonê û bi aliyê Nêayê ve ditewiya.

¹⁴ Sînorê wan ê bakur ji wir dizivirî, digihîşt Hannatonê û li Geliyê Yîftahêlê diqediya.

¹⁵ Herwiha Qattat, Nahalal, Şîmron, Yîdala û Bêtlehem di mîrasa wan de bûn; bi gundên xwe ve duwanzdeh bajar.

¹⁶ Ev bajar bi gundên xwe ve mîrasa binemalên Zevûloniyan bûn.

Mîrasa eşîra Îssexar

¹⁷ Pişka çaran li binemalên Îssexariyan ket.

¹⁸ Di mîrasa wan de ev hebûn: Yîzreyêl, Kesullot, Şûnêm,

¹⁹ Hafarayîm, Şîon, Anaharat,

²⁰ Rabbît, Qîşyon, Eves,

²¹ Remet, Eyn-Gannîm, Eyn-Hadda û Bêtpassês.

²² Sînorê wan Tavorê, Şahasîma û Bêtşemeşê derbas dikir û li Çemê Şerîayê diqediya; bi gundên xwe ve şanzdeh bajar.

²³ Ev bajar bi gundên xwe ve mîrasa binemalên Îssexariyan bûn.

Mîrasa eşîra Aşêr

²⁴ Pişka pêncan li binemalên Aşêriyan ket.

²⁵ Di nav sînorê wan de ev hebûn: Helqat, Halî, Beten, Akşaf,

²⁶ Alam-Melek, Emad û Mîşal. Sînor li aliyê rojava digihîşt Karmel û Şîhor-Lîvnatê.

²⁷ Ji vir ber bi aliyê rojhilat ve digihîşt Bêtdagonê, ber bi aliyê bakur ve heta sînorê Zevûloniyan û Geliyê Yîftahêlê diçû û digihîşt Bêtêmeq û Neiyêlê. Piştre ber bi aliyê bakur ve diçû û digihîşt Kavûl,

²⁸ Evron, Rehov, Hammon û Qanayê û heta Saydaya Mezin dirêj dibû.

²⁹ Ji wir sînor dizivirî Ramayê û digihîşt Sûra bajarê bi sûran pêçayî. Ji wir jî dizivirî Hosayê û li Derya Spî diqediya. Herwiha tê de Mahalav, Akzîv,

³⁰ Ûmma, Afêq û Rehov hebûn. Bi gundên xwe ve bîst û du bajar bûn.

³¹ Ev bajar bi gundên xwe ve mîrasa binemalên Aşêriyan bûn.

Mîrasa eşîra Neftelî

³² Pişka şeşan li binemalên Nefteliyiyan ket.

³³ Sînorê wan ji darmaziya Saenannîmê ya ku li Hêlefê bû destpê dikir, digihîşt Adamî-Neqev, Yavneyêl û Laqqûmê û li Çemê Şerîayê diqediya.

³⁴ Ji wir, ew ber bi aliyê rojava ve ditewiya Aznot-Tavorê û digihîşt Hûqoqê. Sînorên wan li başûr heta sînorê Zevûloniyan, li rojava heta sînorê Aşêriyan û li rojhilat heta Çemê Şerîayê dirêj dibû.

³⁵ Bajarên bi sûran jî ev bûn: Siddîm, Sêr, Hammat, Raqqat, Kînneret,

³⁶ Adama, Rama, Hasor,

³⁷ Qedeş, Edreî, Eyn-Hasor,

³⁸ Yîron, Mîgdal-Êl, Horêm, Bêtenat û Bêtşemeş; bi gundên xwe ve nozdeh bajar.

³⁹ Ev bajar bi gundên xwe ve mîrasa binemalên Nefteliyiyan bûn.

Mîrasa eşîra Dan

⁴⁰ Pişka heftan li binemalên Daniyan ket.

⁴¹ Bajarên di nav sînorên mîrasa wan de ev bûn: Sora, Eştaol, Îr-Şemeş,

⁴² Şaelabbîn, Ayalon, Yîtla,

⁴³ Elon, Tîmna, Eqron,

⁴⁴ Êlteqe, Gîbbeton, Baalat,

⁴⁵ Yehûd, Benê-Beraq, Gat-Rîmmon,

⁴⁶ Me-Yarkon, Raqqon û axa li pêşberî Yafayê.

⁴⁷ Çaxê axa Daniyan ji destê wan derket, rabûn ku li dijî Leşemê şer bikin. Gava wan bajar desteser kir û gelê bajêr da ber şûran, ew der ji xwe re kir milk û tê de rûniştin. Wan navê bavkalê xwe Dan li Leşemê danî.

⁴⁸ Ev bajar bi gundên xwe ve mîrasa binemalên Daniyan bûn.

Mîrasa Yêşûyê Pêxember

⁴⁹ Gava Îsraêliyan bi mîrasî herêmên welêt parve kirin, wan ji axa xwe mîras da Yêşûyê kurê Nûn.

⁵⁰ Li ser fermana devê Xudan, wan bajarê ku wî dixwest da wî. Bi vî awayî Yêşû Tîmnat-Serahaya li herêma çiyayî ya Efrayîmê, ava kir û tê de rûnişt.

⁵¹ Mîrasên Êlezarê Kahin, Yêşûyê kurê Nûn û serekên binemalên eşîrên gelê Îsraêl bi riya pişkê li Şîloyê, li hizûra Xudan, li ber deriyê Konê Hevdîtinê dabûn, ev bûn. Bi vî awayî wan parvekirina welêt qedand.