Yêşû 14 - Kurmanji Încîl

Parvekirina axa li rojavayê Çemê Şerîayê

¹ Axa ku gelê Îsraêl li welatê Kenanê bi mîrasî stand, ev bû ku Êlezarê Kahin, Yêşûyê kurê Nûn û serekên binemalên eşîrên Îsraêl li wan parve kir.

² Çawa ku Xudan bi riya Mûsa emir kiribû, mîrasa neh eşîr û nîveşîrekê bi riya pişkê hat parvekirin.

³ Çimkî Mûsa axa li rojhilatê Çemê Şerîayê bi mîrasî dabû du eşîr û nîveşîrekê. Lê wî di nav wan de milk nedabû Lêwiyiyan.

⁴ Herwiha Ûsivî du eşîr bûn; Efrayîm û Minaşşe. Li welêt para Lêwiyiyan nebû, tenê bajarên ku lê rûnin û mêrgên wan ku pezê xwe lê biçêrînin.

⁵ Çawa ku Xudan li Mûsa emir kiriye, gelê Îsraêl wiha kir. Wan welat parve kir.

Hevrona Kalêv

⁶ Cihûdayî hatin Gîlgalê ba Yêşû. Kalêvê kurê Yefûnneyê Qenîzzî ji Yêşû re got: “Tu dizanî ku Xudan li Qadêş-Barnêayê ji Mûsayê zilamê Xwedê re çi li ser min û te got.

⁷ Çaxê Mûsayê xulamê Xudan ji Qadêş-Barnêayê ez şandim ku sixûriya welêt bikim, ez çil salî bûm. Çawa ku min dîtiye, min bi dilsozî jê re got.

⁸ Birayên ku bi min re hatin, çavê gel tirsand, lê min ji dil da pey Xwedayê xwe Xudan.

⁹ Wê rojê Mûsa sond xwar û got: ‘Axa ku te pê lê kiriyê, wê her û her ji te û zarokên te re mîras bimîne. Çimkî te ji dil da pey Xwedayê min Xudan.’

¹⁰ Va ye, çawa ku wî got, Xudan jiyana min parast. Gava gelê Îsraêl di beriyê de geriya, ji roja ku Xudan ev yek ji Mûsa re gotibû vir ve çil û pênc sal derbas bû. Ez niha heştê û pênc salî me.

¹¹ Ez îro jî wekî roja ku Mûsa ez şandim li ser xwe me. Wê rojê hêza min çi be, îro jî, ji bo çûn û hatina şer wisa ye.

¹² Çawa ku Xudan wê rojê gotiye, tu îro vê herêma çiyayî bide min. Te jî wê rojê bihîstibû ku Enaqî li wê derê rûdinin û bajarên wan bi sûr in. Heke Xudan bi min re bibe alîkar, ezê çawa ku wî ji min re gotibû, wan biqewitînim.”

¹³ Wê gavê Yêşû ew pîroz û bereket kir û Hevronê bi mîrasî da Kalêvê kurê Yefûnne.

¹⁴ Loma Hevron heta îro jî milkê Kalêvê kurê Yefûnneyê Qenîzzî ye. Çimkî wî ji dil da pey Xwedayê Îsraêl Xudan.

¹⁵ Navê Hevronê yê berê Qîryat-Arba bû. Arba navê mirovê herî mezin ê Enaqiyan bû. Bi vî awayî şer qediya û welat di nav aştiyê de ma.