Yêşû 11 - Kurmanji Încîl

Têkbirina bajarên li bakur

¹ Gava Yavînê Padîşahê Hasorê ev yek bihîst, ji Madonê Padîşahê Yovavê, Padîşahê Şîmronê, Padîşahê Akşafê,

² ji padîşahên herêma çiyayî ya bakur, padîşahên Eravaya ku li başûrê Gola Kînneretê ye, padîşahên Şefêlaya bakur, padîşahên Nafot-Dora ku li rojava ye,

³ ji Kenaniyên li rojhilat û li rojava ne, ji Amorî, Hîtîtî, Perîzzî, ji Yevûsiyên li herêma çiyayî ne û ji Hîwiyên ku li jêr Çiyayê Hermonê, li herêma Mîspayê ne re xeber şand.

⁴ Ev padîşah jî bi hemû artêşên xwe re, bi leşkerên xwe yên ku wekî sêlaka ber deryayê nedihatin hejmartin, bi gelek hesp û erebeyên xwe yên şer dan rê.

⁵ Ev hemû padîşah bûn yek, hatin li ber keviyên ava Mêromê û artêşgehên xwe danîn ku li dijî gelê Îsraêl şer bikin.

⁶ Xudan ji Yêşû re got: “Ji wan netirse. Ezê sibê vî çaxî hemûyan li ber Îsraêliyan bişikênim. Hûnê hespên wan seqet bikin û erebeyên wan ên şer bişewitînin.”

⁷ Îcar Yêşû bi tevahiya artêşa xwe re, li ber keviyên ava Mêromê jinişkave bi ser wan ve çû û êrîşî wan kir.

⁸ Xudan ew dan destê gelê Îsraêl. Wan ew şikandin û heta Saydaya Mezin û Mîsrefot-Mayîmê û ber bi rojhilat ve heta Geliyê Mîspeyê dan pey wan. Wan li wan xist û tu kes sax nehişt.

⁹ Çawa ku Xudan lê emir kiribû, Yêşû wiha kir. Wî hespên wan seqet kirin û erebeyên wan ên şer şewitandin.

¹⁰ Wê gavê Yêşû vegeriya û Hasorê desteser kir. Wî padîşahê wê da ber şûran. Çimkî berê, Hasor serê tevahiya van padîşahiyan bû.

¹¹ Îsraêliyan hemû kesên di bajêr de dan ber şûran. Wan ew bi tevahî tune kirin. Tu kesê hilma xwe dide û distîne nema. Wan Hasor şewitand.

¹² Çawa ku Mûsayê xulamê Xudan lê emir kiribû, Yêşû tevahiya wan padîşahan û bajarên wan desteser kirin, dan ber şûran û bi tevahî tune kirin.

¹³ Lê ji bilî bajarê Hasorê yê ku Yêşû agir berdayê, gelê Îsraêl tu bajarên li ser giran neşewitandin.

¹⁴ Îsraêliyan hemû heywan û talanên van bajaran ji xwe re standin. Lê hemû mirovan dan ber şûran û tune kirin. Wan tu kesê hilma xwe dide û distîne nehişt.

¹⁵ Çawa ku Xudan li Mûsayê xulamê xwe emir kiribû, Mûsa wiha li Yêşû emir kiribû û Yêşû jî wiha kir. Wî hemû tiştên Xudan li Mûsa emir kiribûn, pêk anîn.

¹⁶ Bi vî awayî Yêşû tevahiya welêt desteser kir; herêma çiyayî, tevahiya Negev û herêma Goşenê, Şefêla, Erava, herêma çiyayî ya gelê Îsraêl û palên wan.

¹⁷ Herwiha ji Çiyayê Halaqê yê ku ji Seîrê dertê heta Baal-Gada ku li Deşta Lubnana li quntara Çiyayê Hermonê ye jî desteser kir. Wî hemû padîşahên van deran desteser kirin, li wan xist û kuştin.

¹⁸ Yêşû demeke dirêj li dijî tevahiya van padîşahan şer kir.

¹⁹ Ji bilî Hîwiyên ku li Gîvonê rûniştin, bajarekî ku bi gelê Îsraêl re peymana aştiyê çêkiribe tunebû. Hemû bajar bi şer hatin desteserkirin.

²⁰ Çimkî Xudan dilê wan hişk kiribû ku ew li dijî gelê Îsraêl şer bikin û bên tunekirin. Çawa Xudan li Mûsa emir kiribû, ew li ber wan neketin û tune kirin.

²¹ Wî çaxî Yêşû bi ser Enaqiyan ve çû û wî ew ji herêma çiyayî, ji Hevron, Devîr û Enavê, ji hemû herêmên çiyayî yên Cihûdayê û Îsraêlê helak kirin. Yêşû bi bajarên wan ve, bi tevahî ew tune kirin.

²² Li welatê Îsraêliyan Enaqiyek jî nema. Bi tenê li Gat, Xeza û Aşdodê hinek ji wan sax man.

²³ Çawa ku Xudan ji Mûsa re gotibû, Yêşû tevahiya welêt desteser kir û di nav eşîrên Îsraêl de bi milkî parve kir. Bi vî awayî şer qediya û welat di nav aştiyê de ma.