Yêşû 1 - Kurmanji Încîl

Emrê Xudan ê li Yêşûyê Pêxember

¹ Piştî mirina Mûsayê xulamê xwe, Xudan ji xizmetkarê Mûsa, Yêşûyê kurê Nûn re got:

² “Xulamê min Mûsa mir. Niha rabe û bi tevahiya gel re Çemê Şerîayê derbas bike û here wî welatê ku ez didim gelê Îsraêl.

³ Çawa ku min soz daye Mûsa, her cihê binê piyê we lê bikeve, ezê bidim we.

⁴ Wê ji beriyê heta herêma çiyayî ya Lubnanê, ji Çemê Mezin ê Feratê bigire –tevahiya welatê Hîtîtiyan jî di nav de– wê aliyê rojava heta Derya Spî bibe sînorên we.

⁵ Wê di hemû rojên jiyana te de tu kes li dijî te ranebe, çawa ku ez bi Mûsa re bûm, wisa jî ezê bi te re bim. Ezê te bernedim û nehêlim.

⁶ Hêzdar û wêrek be. Çimkî diyarê ku min ji bav û kalên wan re sond xwar ku ezê bidim wan, tê wan bibî wî welatê ku ji xwe re bikin milk.

⁷ Tenê hêzdar û wêrek be. Hay jê hebe ku tu tevahiya Şerîeta xulamê min Mûsa li te emir kir, pêk bînî. Ji wê bi milê çep û rastê ve averê nebe ku li her dera tu diçî de bi ser bikevî.

⁸ Divê ev Nivîsa Şerîetê ji devê te nekeve, ji bo ku tu bi baldarî ya ku tê de hatiye nivîsandin pêk bînî, tê bi şev û roj li ser wê kûr bifikirî. Wî çaxî wê riya te vebe û tê bi ser bikevî.

⁹ Ma min ji te re negot hêzdar û wêrek be? Netirse û neşikê. Çimkî li her dera ku tu bimeşî, Xwedayê te Xudan bi te re ye.”

Emrê Yêşûyê Pêxember ê li gel

¹⁰ Yêşû emir da peywirdarên gel û ji wan re got:

¹¹ “Di nav artêşgehê de bigerin, emir bidin gel û bêjin: ‘Ji bo xwe xurek amade bikin. Çimkî ji bo hûn welatê ku Xwedayê we Xudan dide we ji xwe re bikin milk, sê roj paşê hûnê di Çemê Şerîayê re derbas bibin.’”

¹² Yêşû ji eşîrên Gad, Rûbên û nîveşîra Minaşşe re got:

¹³ “Gotina ku Mûsayê xulamê Xudan li we emir kir bi bîr bînin ku digot: ‘Wê Xwedayê we Xudan vî welatî bide we û we bigihîne rihetiyê.’

¹⁴ Wê jinên we, zarokên we û heywanên we li rojhilatê Çemê Şerîayê bimînin ku wî ew ax da we. Îcar hûn, hemû mêrxasên şervan bi çekên xwe, beriya birayên xwe çêm derbas bikin.

¹⁵ Çawa ku Xudan rihetî daye we, gava bide wan û ew jî axa ku Xwedayê we Xudan dide wan, ji xwe re bikin milk, hûnê ji wan re bibin alîkar. Wî çaxî hûnê vegerin ser axa xwe û ji xwe re bikin milk. Çimkî Mûsayê xulamê Xudan ev axa li rojhilatê Çemê Şerîayê daye we.”

¹⁶ Wan ji Yêşû re got: “Her tiştê ku tu li me emir bikî, emê bikin. Tu me bişînî ku derê, emê herin wir.

¹⁷ Me çawa di her tiştî de guhdariya Mûsa kir, emê wisa jî guhdariya te bikin. Tenê bila Xwedayê te Xudanê ku bi Mûsa re bû, bi te re be jî.

¹⁸ Tu çi emir bikî, her kesê guh nede gotina te û li dijî emrên te rabe, wê bê kuştin. Tenê tu hêzdar û wêrek be.”