Yêremya 52 - Kurmanji Încîl

Ketina Orşelîmê

¹ Gava Sîdqiya bû padîşah bîst û yek salî bû. Wî li Orşelîmê yanzdeh salan padîşahî kir. Diya Sîdqiya Hamûtala keça Yêremyayê Lîvnayî bû.

² Wekî hemû tiştên Yehoyaqîm kirin, wî tiştên di çavê Xudan de xerab in, kirin.

³ Hêrsa Xudan li dijî Orşelîm û Cihûdayê ewqas rabû ku wî ew ji çavê xwe avêtin. Sîdqiya li dijî Padîşahê Babîlê serî rakir.

⁴ Di roja dehê meha dehan a nehsaliya padîşahiya Sîdqiya de Nebûxadnessarê Padîşahê Babîlê bi tevahiya artêşa xwe re hat Orşelîmê û artêşgeh ava kir. Li derdora sûrên wê pal çêkirin.

⁵ Heta yanzdeh saliya padîşahiya Sîdqiyayê Padîşah, bajar dorpêçkirî ma.

⁶ Di roja nehê meha çaran de li bajêr xela wisa dijwar bû ku êdî nanê gelê welêt nema.

⁷ Di sûrên bajêr de qulek hat vekirin û tevahiya leşkeran reviyan. Tevî ku Kildaniyan seranserê bajêr dorpêç jî kiribû, ew bi şev, di dergehê di navbera herdu dîwarên li ber bexçeyê padîşah re ber bi Eravayê ve reviyan.

⁸ Lê artêşa Kildaniyan da pey Sîdqiyayê Padîşah û li deştên Erîhayê gihîşt wî. Tevahiya artêşa wî terka wî kir û belav bû.

⁹ Wan Sîdqiyayê Padîşah girt û bir Rîvlaya li herêma Hamayê, ba Padîşahê Babîlê. Wî jî dîwana wî kir.

¹⁰ Padîşahê Babîlê kurên Sîdqiya li ber çavê wî serjê kirin. Hemû serekên Cihûdayê jî li Rîvlayê serjê kirin.

¹¹ Wî çavên Sîdqiya derxistin û ew bi zincîrên tûncîn ve girê da. Wî ew bir Babîlê û heta roja mir, di girtîgehê de hişt.

¹² Di roja dehê meha pêncan a nozdehsaliya padîşahiya Nebûxadnessarê Padîşahê Babîlê de Nebûzaradanê fermandarê parêzvanan ket Orşelîmê ku xulamiya Padîşahê Babîlê dikir.

¹³ Wî agir berda Mala Xudan, qesra padîşah û tevahiya malên Orşelîmê. Tevahiya malên mezin şewitandin.

¹⁴ Tevahiya artêşa Kildaniyan ku bi fermandarê parêzvanan re ne, hemû sûrên Orşelîmê jî hilweşandin.

¹⁵ Nebûzaradanê fermandarê parêzvanan hinek belengazên gel, kesên di bajêr de sax mane û leşkerên firar ên derbasî aliyê Padîşahê Babîlê bûne sirgûn kirin. Wî tevahiya hosteyên mayî ajot.

¹⁶ Lê Nebûzaradanê fermandarê parêzvanan hinek belengazên welêt hiştin ku bibin rezvan û cotkar.

¹⁷ Kildaniyan stûnên tûncîn, tevî hewza tûncîn û binikên li Mala Xudan perçe kirin û hemû tûncên wan birin Babîlê.

¹⁸ Sîtil, bêr, meqesên fitîlan, tasik, firaxê bixûrê û hemû taximên tûncîn ên ku wan li Perestgehê pê xizmet dikirin, birin.

¹⁹ Tas, tepsik, tasik, sîtil, şamdank, firaxên bixûrê û tasên pêşkêşiya rijandinê birin. Fermandarê parêzvanan hemû tiştên zêrîn û hemû tiştên zîvîn birin.

²⁰ Tevahiya tûncê du stûnan, hewzek, duwanzdeh peykerên conegayên tûncîn ên binî û binikên ku Silêmanê Padîşah ji bo Mala Xudan çêkiribûn jî, nedihatin kişandin.

²¹ Bilindahiya stûnekê hijdeh gaz, derdora wê jî duwanzdeh gaz bû. Stûrbûna tûncê her yekî ji wan, çar tilî bû û hundirê wê vala bû.

²² Serikekî wê yê tûncîn hebû û bilindahiya serik jî pênc gaz bû. Li dora serik, toreke pêçayî û şiklên hinaran hebûn ku ji tûncê bûn. Xemla herdu stûnan yek bû û bi şiklên hinaran hatibûn nexişandin.

²³ Li kêlekan, motîvên nod û şeş hinaran hebûn. Li ser rêza ku dora serik dipêça, li ser hev sed motîvên hinaran hebûn.

Cihûdayî sirgûnî Babîlê tên kirin

²⁴ Fermandarê parêzvanan, Serayayê Serkahin, Sefanyayê kahinê diduyan û sê dergevan dîl girtin.

²⁵ Ji bajêr fermandarê ku serweriya leşkeran dikir û heft zilamên li bajêr ên ji şêwirmendên padîşah, serleşkerê ku gelê welêt ji bo leşkeriyê dinivîsand û ji gelê welêt ê ku li nav bajêr bû, şêst kes birin.

²⁶ Nebûzaradanê fermandarê parêzvanan ew birin Rîvlayê, ba Padîşahê Babîlê.

²⁷ Padîşahê Babîlê li welatê Hamayê, li Rîvlayê li wan xist û ew kuştin. Bi vî awayî gelê Cihûda, ji welatê xwe hat sirgûnkirin.

²⁸ Hejmara kesên ku Nebûxadnessar sirgûn kirin, ev e: Di sala heftan de 3.023 Cihûdayî hatin sirgûnkirin,

²⁹ Di hijdehsaliya padîşahiya Nebûxadnessar de wî ji Orşelîmê 832 kes

³⁰ û di sala xwe ya bîst û sisêyan de, Nebûzaradanê fermandarê parêzvanan jî 745 Cihûdayî sirgûn kirin. Hemû kesên hatine sirgûnkirin 4.600 kes bûn.

Yehoyaxînê Padîşah tê berdan

³¹ Di sî û heft saliya sirgûnbûna Yehoyaxînê Padîşahê Cihûdayê de, di roja bîst û pêncê meha duwanzdehan de, Ewîl-Merodakê Padîşahê Babîlê li ber Yehoyaxîn ket û ew ji girtîgehê berda. Wê salê ew bûbû padîşah.

³² Wî tiştên xweş jê re gotin û textê wî, ji textên padîşahên li Babîlê pê re ne, bilindtir danî.

³³ Yehoyaxîn kincên xwe yên girtîgehê avêtin. Wî di hemû rojên jiyana xwe ya mayî de li hizûra Padîşahê Babîlê xwarin xwar.

³⁴ Di hemû rojên jiyana wî de, heta sax bû, her roj xwarina wî ji hêla padîşah ve hat dayîn.