Yêremya 50 - Kurmanji Încîl

Gotina li dijî Babîlê

¹ Gotina ku Xudan li dijî Babîla welatê Kildaniyan bi riya Yêremyayê Pêxember got, ev e:

² “Di nav miletan de bêjin, bidin bihîstin! Alê daçikînin, bidin bihîstin! Veneşêrin û bêjin: ‘Babîl hat standin! Bêlê îlah şermezar bû, Mardûk hat şikestin. Îlahên wê şermezar bûn, pûtên wê şikestin.’

³ Çimkî wê miletekî bakur bi ser wê de were Û welatê wê wêran bike. Wê tu kes tê de rûnene, Wê mirov û heywan jê birevin.”

⁴ Gotina Xudan ev e: “Di wan rojan de, di wê demê de, Wê gelê Îsraêl û gelê Cihûda bi hev re werin. Wê bi girî werin û li Xwedayê xwe Xudan bigerin.

⁵ Wê li riya Siyonê bipirsin û berê xwe bidinê. Wê werin û bi peymana herheyî ya nayê jibîrkirin, Bi Xudan ve bên girêdan.

⁶ “Gelê min miyên windabûyî ye. Şivanên wan ew ji rê derxistin Û li serê çiyê ew berdan. Ew li gelek gir û çiyayan digerin, Mêrgên xwe ji bîr kirin.

⁷ Her kesê ew dîtin, ew xwar. Neyarên wan got: ‘Em ne sûcdar in, Sedem sûcê wan e! Ew li dijî Xudanê ku mêrga rastiyê ye, Li dijî Xudanê hêviya bav û kalên wan, sûcdar bûn.’

⁸ “Ji Babîlê birevin! Ji welatê Kildaniyan derkevin! Wekî nêriyê li pêşiya pêz, herin!

⁹ Çimkî va ye, ezê ji herêma bakur, Komeke miletên mezin rakim û li dijî Babîlê derînim. Wê ji wir werin, Li dijî wê tevdîra şer bikin Û desteser bikin. Tîrên wan, wekî tîrên mêrxasan in, Wê yek jî vala nezivire.

¹⁰ Wê welatê Kildaniyan bê şelandin, Wê hemû talankar têr bibin.” Ev e gotina Xudan.

Gotina li ser ketina Babîlê

¹¹ “Ya talankarên mîrasa min! Tevî ku hûn şa û dilgeş dibin, Tevî ku hûn wekî çêlekeke li mêrgê dipengizin Û wekî hespan dihîrin,

¹² Wê diya we gelekî şerm bike. Erê, wê jina ku hûn jê çêbûn, rûreş bibe. Va ye, wê bibe miletê herî biçûk, Bibe çol, berî û dereke ziwa.

¹³ Ji ber hêrsa Xudan, Wê tu kes tê de rûnene, Wê bi tevahî vikîvala be. Hemû kesên derbasî Babîlê bibin, Wê şaş û metel bimînin, Ji ber hemû birînên wê bifîkînin.

¹⁴ Tîravêjno! Li derdora Babîlê tevdîra şer bikin! Tîran bavêjinê, tîrekî jî texsîr nekin, Çimkî wê li dijî Xudan guneh kir.

¹⁵ Ji her alî ve li dijî wê biqîrin! Teslîm bû! Bircên wê ketin, Sûrên wê hilweşiyan! Çimkî ev tola Xudan e. Heyfê jê bistînin, Çi kiribe, bînin serê wê.

¹⁶ Di dema dirûtinê de, Kesê tov direşîne tevî dasvan ji Babîlê bavêjin. Wê ji ber şûrê zordar, Her kes li gelê xwe bizivire û bireve welatê xwe.

Vegera gelê Îsraêl

¹⁷ “Gelê Îsraêl pezê belavbûyî ye ku şêran ew revand. Pêşî Padîşahê Aşûrê ew xwarin, Paşê Nebûxadnessarê Padîşahê Babîlê jî hestiyên wan kotin.”

¹⁸ Loma Xwedayê Îsraêl Xudanê Karîndar wiha dibêje: “Çawa ku min Padîşahê Aşûrê ceza kiribe, Ezê Padîşahê Babîlê û welatê wî jî wisa ceza bikim.

¹⁹ Ezê gelê Îsraêl careke din bînim mêrga wî Û wê li Başan û Karmelê biçêre. Wê li herêmên çiyayî yên Efrayîm û li Gîladê xwe têr bike.”

²⁰ Gotina Xudan ev e: “Di wan rojan û di wê demê de Wê li sûcê gelê Îsraêl bigerin, lê wê tunebe. Wê li gunehên gelê Cihûda bigerin, lê wê nebînin. Çimkî ezê wan kesan bibexişînim ku min sax hiştine.

Wê Xwedê Babîlê dadbar bike

²¹ “Rabe here welatê Meratayîmê! Bi ser wê de here, êrîşê şêniyên Peqodê bike. Wan bi tevahî tune bike.” Ev e gotina Xudan. “Çawa ku min li te emir kiriye, wisa bike.

²² Dengê şer û şikestina mezin li welêt tê bihîstin.

²³ Çawa çakûçê tevahiya dinyayê hat şikestin û jêkirin! Çawa Babîl di nav miletan de wêran bû!

²⁴ Babîlê! Min ji bo te dafik danî, Te ne zanî û ketiyê. Tu hatî dîtin û girtin, Çimkî tu li dijî Xudan derketî.

²⁵ Xudan xezîneya xwe vekir Û çekên hêrsa xwe deranîn. Çimkî li welatê Kildaniyan, Karê Xudanê Karîndar Reb heye.

²⁶ Ji her alî ve bi ser wê de werin. Embarên wê vekin. Wekî dexlê, wê kom bi kom bikin. Bi tevahî tune bikin, bila tiştek jê nemîne.

²⁷ Hemû conegayên wê bikujin, bila herin serjêbûnê! Wey li wan! Çimkî roja wan, Dema cezakirina wan hat!

²⁸ Dengê kesên ji welatê Babîlê reviyane û filitîne tê! Wê heyfa Xwedayê me Xudan û Perestgeha wî, Li Siyonê bidin bihîstin.

²⁹ “Gazî tîravêjan û hemû kesên kevanan ditikînin bikin, Li dijî Babîlê bicivînin. Li derdora wê artêşgehan deynin, Bila tu kes nefilite. Bergîdana karê wê bidin, Çi kiribe, bînin serê wê. Çimkî wê li dijî Xudan, Li dijî Pîrozê Îsraêl quretî kir.

³⁰ Loma wê hemû şervanên wan li meydanan bikevin, Wê rojê wê hemû şervanên wan bêdeng bin.” Ev e gotina Xudan.

³¹ Gotina Reb Xudanê Karîndar ev e: “Qureyo! Ez li dijî te me! Çimkî roja te, dema cezakirina te hat.

³² Kesê qure wê biterpile û bikeve Û wê tu kes wî raneke. Ezê bajarên wî bidim ber êgir, Wê agir her tiştê derdora wî bixwe.”

³³ Xudanê Karîndar wiha dibêje: “Hem gelê Îsraêl hem gelê Cihûda jî eziyet kişand. Kesên ew dîl girtine hişk bi wan digirin, Naxwazin wan azad bikin.

³⁴ Lê rizgarkarê wan hêzdar e, Navê wî Xudanê Karîndar e. Wê esse doza wan biparêze Ku ji dinyayê re rihetiyê Û ji şêniyên Babîlê re nerihetiyê bîne.”

³⁵ Gotina Xudan ev e: “Şûrek li dijî Kildaniyan û şêniyên Babîlê, Li dijî serek û şehrezayên wê tê!

³⁶ Erê, şûrek li dijî pêxemberên derewîn tê ku dîn bike. Li dijî mêrxasan jî şûrek tê ku wan perçe dike.

³⁷ Li dijî hesp û erebeyên wê, Li dijî hemû xerîbên nav wê şûrek tê Ku wê bike wekî jinan. Li dijî xezîneyên wê şûrek tê Ku wan talan bike.

³⁸ Li dijî ava wê hişkesalî tê ku ziwa bikin. Çimkî ew bû welatê pûtan Û bi îlahên xwe har bûn.

³⁹ “Loma wê heywanên çolê, Li wir bi çeqelan re rûnin. Wê pepûk li wê derê bijîn. Wê tu kes heta hetayê li wir rûnene Û nifş bi nifş li wê derê nejî.

⁴⁰ Çawa ku Xwedê Sodom û Gomorayê Û cîranên wan serobino kirin, Wê mirov li wir rûnene, Wê tu kurê mirovan li wê derê nemîne.” Ev e gotina Xudan.

⁴¹ “Va ye, ji aliyê bakur ve miletek tê. Ji binê dinyayê ve miletekî mezin Û pir padîşah dikevin nava liv û tevgerê.

⁴² Di destên wan de rim û kevan hene. Ew zalim û bêrehm in. Dengê wan wekî xuşîna deryayê ye, Ew li hespan siwar dibin. Mîna şervanên ku tevdîra şer kirine, Ew li dijî te ne, ya Babîla keç!

⁴³ Padîşahê Babîlê xebera wan bihîst Û destê wî sist bû. Wekî jina ber zarokan, Êş û tengasiyê ew girt.

⁴⁴ Va ye, wekî şêrê ji nav deviyên Çemê Şerîayê dertê mêrga avî, Ezê jinişkave Kildaniyan ji cihê wan biqewitînim. Kesê ez hilbijêrim, ezê li ser wan bikim serwer. Gelo yê wekî min heye? Ma kî dikare dozê li min veke? Şivanê li ber min bisekine kî ye?”

⁴⁵ Loma guh bidin pîlana Xudan a li dijî Babîlê! Guhdariya armanca wî ya li ser welatê Kildaniyan bikin: “Wê karik û berxik bên kaşkirin, Ji rûyê wan, wê mêrgên wan wêran bike.

⁴⁶ Bi dengê ‘Babîl hat standin’ wê dinya biheje, Wê hewara wê di nav miletan de bê bihîstin.”