Yêremya 48 - Kurmanji Încîl

Gotina li dijî Moavê

¹ Li dijî Moavê: Xwedayê Îsraêl Xudanê Karîndar wiha dibêje: “Wey li Neboyê! Wê wêran bibe. Wê Qîryatayîm şermezar be û bikeve dest, Wê birc şermezar bin û bişikên.

² Êdî wê pesnê Moavê nemîne, Li Heşbonê wê li dijî wê fen û fût bikin. Wê bibêjin: ‘Werin em bişikênin, Bila ji miletbûnê bikeve!’ Madmênîno! Hûnê hiş bin! Wê şûr li pey we keve.

³ Wê li Horonayîmê hewar bê bihîstin, Hilweşîn û şikestina mezin!

⁴ “Wê Moav hilweşe, zarokên wê dikin hewar.

⁵ Çimkî bi girî ji Hevrazê Lûhît dertên. Ew li berjêrê Horonayîmê, Hewara tengasî û şikandinê dibihîzin.

⁶ Birevin! Canê xwe rizgar bikin, Bibin wekî kerê çolê yê li beriyê!

⁷ “Ji ber ku te xwe spart kar û xezîneyên xwe, Tê jî bêyî standin. Wê îlahê te Kemoş jî, Bi kahin û serekên xwe re sirgûn bibe.

⁸ Çawa ku Xudan got, Wê xerabkar here her bajarî Û wê tu bajar rizgar nebe. Hem gelî hem deşt wê tune bibin.

⁹ Xwê li ser axa Moavê bireşînin ku bêber be. Wê bajarên wê wêran û bêkes bin.

¹⁰ Nalet li wî kesî ku karên Xudan bi sistî dike, Nalet li wî kesî ku şûrê xwe ji xwînrijandinê diparêze.

¹¹ Moav ji xortaniya xwe ve bêxem bû. Wekî şerabê, li ser ritama xwe ma, Ji ceran valayî cerên din nekirin. Ji ber ku neçû sirgûnê, Çêj ma û bêhna wê neguherî.”

¹² Gotina Xudan ev e: “Loma va ye! Roj tên ku ezê şerabçêkeran bişînim ku ceran vala bikin û li cerên din bixin. Wê cerên wan birijînin û perçe bikin.

¹³ Çawa ku Mala Îsraêl li Bêt-Êlê şerm kir ku pê ewle bûye, wê Moav ji Kemoşê îlah wisa şerm bike.

¹⁴ “Tu çawa dibêjî, ‘Em mêrxas in û şervanên amade ne’?

¹⁵ Xerabkarê Moavê û bajarên wê hat Û xortên wê yên bijare ji bo ku bên serjêkirin daketin.” Ev e gotina Padîşahê ku navê wî Xudanê Karîndar e.

¹⁶ “Felaketa Moavê nêzîk e, Belaya wan bi lez tê.

¹⁷ Ya kesê derdora Moavê, Ya her kesê navê wan dizane binale! Bêje: ‘Gopalê hêzê û darê berziyê çawa şikest!’

¹⁸ “Ya şêniyên Dîvona keç! Ji bilindbûnê dakevin, li axa ziwa rûnin! Çimkî wê xerabkarê Moavê Li dijî we jî rabe û sûrên we hilweşîne.

¹⁹ Ya şêniyên Eroêrê! Li keviya rê bisekinin û binêrin! Ji zilamê direve û jina difilite bipirse: ‘Çi bû?’

²⁰ Moav şikest loma şermezar bû, Bikin hewar û zarîn! Wêranbûna Moavê li Geliyê Arnonê bidin bihîstin!

²¹ “Dadbarî bi ser welatê deştê de tê. Erê, wê bi ser Holon, Yahas, Mefaet,

²² Dîvon, Nebo, Bêtdîvlatayîm,

²³ Qîryatayîm, Bêtgamûl, Bêtmeon,

²⁴ Qeriyot, Bosra û hemû bajarên welatê Moavê yên dûr û nêzîk de werin.

²⁵ Hêza Moavê hat birîn û zendê wê hat şikestin.” Ev e gotina Xudan.

²⁶ “Ji ber ku li dijî Xudan xwe mezin kir, Moavê serxweş bikin. Bila di nav vereşîna xwe de Biperpite û ew jî bibe pêkenok!

²⁷ Moavîno! Ma Îsraêl di çavê te de pêkenok bû?! Gelo ma di nav dizan de hatiye girtin, Gava behsa wî dikin, hûn serê xwe dihejînin?!

²⁸ “Ya şêniyên Moavê! Dev ji bajaran berdin, li zinaran bijîn. Wekî wê kevokê bin ku hêlîna xwe li ser keviya geliyekî çêkiriye.

²⁹ Moav gelekî pozbilind e! Me quretî, pozbilindî, kustahî, Pesindan û berzeqiya dilê wê bihîst.”

³⁰ Gotina Xudan ev e: “Ez bi nepixandinên wî dizanim, Kar û pesindanên wî pûç û vala ne.

³¹ Loma ezê ji bo Moavê bikim zarîn, Erê, ji bo tevahiya Moavê bikim hewar Û ji bo gelê Qîr-Herasetê şînê bikim.

³² Ya mêwa Sîvmayê, Ezê ji bo te ji Yazêrê zêdetir bigirîm. Guliyên te ji golê borîn, gihîştin Yazêrê. Xerabkar bi ser rez û fêkiyên te yên havînê de hat.

³³ Ji axa Moavê ya biber, şahî û dilgeşî hat rakirin, Min şerab ji mehseran birî. Tu kes bi şahî tirî naguvêşe, Qîrîn hene, lê ne qîrînên şahiyê.

³⁴ “Hewara Heşbon û Êleleyê digihîje Yahasê, Ji Soarê heta Horonayîmê û Eglat-Şelîşiyayê deng tê. Çimkî ava Nimrîmê jî ziwa bû.

³⁵ Ezê dawiya kesên li Moavê bînim Ku li ser bilindciyan pêşkêşiyan didin Û ji îlahên xwe re bixûrê pêdixin.” Ev e gotina Xudan.

³⁶ “Loma dilê min bûye bilûr Û ji bo Moavê dinale. Ji bo gelê Qîr-Herasetê jî Dilê min wekî bilûrê dinale. Çimkî serweta wan tune bû.

³⁷ “Porê her serî hatiye rûtkirin, Her rih hatiye kurkirin. Li ser her destî, birîn û li piştan tenê çûx heye.

³⁸ Li ser her ban û meydana Moavê, her der şîn dike. Çimkî min Moav wekî taximekî şikand ku tu kes naxwaze.” Ev e gotina Xudan.

³⁹ “Moav çawa şikestibû, çawa dike zarîn! Moav ji şermê pişta xwe zivirand. Moav ji bo hemû kesên derdora xwe Bû pêkenok û mijara sawê.”

⁴⁰ Çimkî Xudan wiha dibêje: “Va ye dijmin wekî teyrekî difire, Baskên xwe bi ser Moavê ve vedike.

⁴¹ Qeriyot hat standin, asêgeh ketin dest. Wê rojê wê dilê mêrxasên Moavê, Wekî dilê jina ku ketiye ber zarokan be.

⁴² Ji ber ku li dijî Xudan xwe mezin kir, Wê Moav heta ji miletbûnê derkeve, tune bikin.

⁴³ Ya şêniyên Moavê! Saw, çal û dafik li ber we ne!” Ev e gotina Xudan.

⁴⁴ “Kesê ji sawê direve, wê bikeve çalê, Kesê ji çalê derkeve jî wê bikeve dafikê. Çimkî ezê sala cezakirinê bînim ser Moavê.” Ev e gotina Xudan.

⁴⁵ “Firar di siya Heşbonê de bêhêz sekinîn, Çimkî ji Heşbonê agir û ji Sîhonê pêt derket Ku eniya Moavê û serê gelê qareqar dikin, xwarin.

⁴⁶ Ya Moavîno! Wey li we! Gelê Kemoş tune bû. Çimkî kurên te sirgûn, keçên te jî êsîr bûn.

⁴⁷ “Lê di rojên pêş de, Ezê Moavê vegerînim firehiya berê.” Ev e gotina Xudan. Dadbarkirina Moavê li vir xilas dibe.