Yêremya 39 - Kurmanji Încîl

Ketina Orşelîmê

¹ Di meha dehan a nehsaliya padîşahiya Sîdqiyayê Padîşahê Cihûdayê de Nebûxadnessarê Padîşahê Babîlê bi tevahiya artêşa xwe re hat Orşelîmê û ew dorpêç kir.

² Di roja nehê meha çaran a sala yanzdeh a padîşahiya Sîdqiya de di sûrên bajêr de qulek hat vekirin.

³ Hemû serekên Padîşahê Babîlê ketin hundir û li ber Dergehê Navîn rûniştin: Nêrgal-Şareserê Samgarî, Nebo-Sarsexîmê serkarmend, Nêrgal-Şareserê Rav-Mag û hemû karmendên din.

⁴ Çaxê Sîdqiyayê Padîşahê Cihûdayê û hemû leşkerên wî ev yek dît, reviyan. Ew bi şev, bi riya bexçeyê padîşah di dergehê di navbera herdu dîwaran re ji bajêr derketin û ber bi Eravayê ve reviyan.

⁵ Lê artêşa Kildaniyan da pey wan û li deştên Erîhayê gihîşt Sîdqiya. Wan ew girt û bir Rîvlaya li herêma Hamayê, ba Nebûxadnessarê Padîşahê Babîlê. Wî jî dîwana wî kir.

⁶ Padîşahê Babîlê, li Rîvlayê kurên Sîdqiya li ber çavê wî serjê kirin. Wî hemû pêşengên Cihûdayê jî li wir serjê kirin.

⁷ Wî çavên Sîdqiya derxistin û ew bi zincîrên tûncîn ve girê da û bir Babîlê.

⁸ Kildaniyan qesra padîşah û malên gel şewitandin û sûrên Orşelîmê hilweşandin.

⁹ Nebûzaradanê fermandarê parêzvanan, kesên li bajêr sax mane –firarên derbasî aliyê wî bûne û kesên din– sirgûnî Babîlê kirin.

¹⁰ Lê Nebûzaradanê fermandarê parêzvanan hinek feqîrên gel ên ku tu tiştekî wan tunebû li welatê Cihûda hiştin û wê rojê wî rez û zevî dan wan.

Yêremyayê Pêxember tê berdan

¹¹ Nebûxadnessarê Padîşahê Babîlê li ser Yêremya emir li Nebûzaradanê fermandarê parêzvanan kir û got:

¹² “Wî bibe û baş lê binêre. Tiştekî xerab pê neke. Çi ji te bixwaze bike.”

¹³ Nebûzaradanê fermandarê parêzvanan, Nebûşazbanê serkarmend, Nêrgal-Şareserê Rav-Mag û hemû serekên Padîşahê Babîlê qasid şandin

¹⁴ û wan Yêremya ji hewşa parêzvanan anî. Wan ew spart Gedalyayê kurê Ahîqamê kurê Şafan ku bibe malê. Bi vî awayî Yêremya di nav gelê xwe de ma.

¹⁵ Hê gava li hewşa parêzvanan girtî bû, gotina Xudan ji Yêremya re hat û got:

¹⁶ “Here ji Eved-Melekê Kûşî re bêje: ‘Xwedayê Îsraêl Xudanê Karîndar wiha dibêje: Ezê gotinên xwe ne ji bo qenciyê, lê ji bo xerabiyê bi ser vî bajarî de bînim. Wê ev tişt di wê rojê de li ber te çêbin.

¹⁷ Lê ezê di wê rojê de te rizgar bikim.’” Ev e gotina Xudan. “‘Tê nekevî destê kesên ji wan ditirsî.

¹⁸ Ezê te esse xilas bikim û tê nekevî ber şûran. Wê canê te ji te re bibe malê talên, çimkî tu bi min ewle bûyî.’” Ev e gotina Xudan.