Yêremya 37 - Kurmanji Încîl

Yêremyayê Pêxember dikeve zîndanê

¹ Sîdqiyayê kurê Yoşiya yê ku Nebûxadnessarê Padîşahê Babîlê wekî Padîşahê welatê Cihûda kifş kir, li cihê Yehoyaqîmê kurê Yehoyaxîn bû padîşah.

² Lê ne wî, ne xulamên wî, ne jî gelê welêt guh da gotinên Xudan ku wî bi riya Yêremyayê Pêxember gotin.

³ Sîdqiyayê Padîşah di wê demê de Yehûxalê kurê Şelemya û Sefanyayê Kahin ê kurê Maesêya şandin ba Yêremyayê Pêxember ku bêjin: “Ji bo me, ji Xwedayê me Xudan re dua bike.”

⁴ Yêremya jî di nav gel de diçû û dihat, çimkî hê neketibû zîndanê.

⁵ Herwiha artêşa Firewn ji Misrê derketibû û Kildaniyên ku Orşelîm dorpêç kiribû, bi bihîstina vê xeberê ji Orşelîmê vekişiyan.

⁶ Wê gavê gotina Xudan ji Yêremyayê Pêxember re hat û got:

⁷ “Xwedayê Îsraêl Xudan wiha dibêje: ‘Ji Padîşahê Cihûdayê re wiha bêje ku tu ji bo şîretê şandiye ba min: Artêşa Firewn a ku ji bo alîkariya we bi rê ket, wê vegere welatê xwe Misrê.

⁸ Wê Kildanî jî vegerin, li dijî vî bajarî şer bikin, bajêr desteser bikin û bişewitînin.’

⁹ Xudan wiha dibêje: ‘Xwe nexapînin û nebêjin: Wê Kildanî esse ji ser serê me herin. Çimkî wê Kildanî neçin.

¹⁰ Hûn tevahiya artêşa Kildaniyan a li dijî we şer dike, têk bibin û tenê birîndarên wan li konê xwe jî bimînin, wê dîsa rabin û vî bajarî bişewitînin.’”

¹¹ Gava artêşa Kildaniyan ji ber artêşa Firewn ji Orşelîmê vekişiya,

¹² Yêremya ji Orşelîmê derket çû welatê Binyamîn ku mîrasa xwe ya ji nav gelê wir para wî ketiye bistîne.

¹³ Gava gihîşt Dergehê Binyamînê, sernobedarê bi navê Yiriyayê kurê Şelemyayê kurê Hananya, Yêremyayê Pêxember girt û got: “Tu diçî aliyê Kildaniyan!”

¹⁴ Yêremya got: “Derew e! Ez naçim aliyê Kildaniyan.” Lê Yiriya guh neda wî, ew girt û bir ba serekan.

¹⁵ Serek li Yêremya hêrs bûn. Wan lê xist û ew li mala Yonatanê Nivîsende hepis kir. Çimkî wan mala wî kiribû zîndan.

¹⁶ Bi vî awayî Yêremya ket çaleke wê zîndanê û ew demeke dirêj li wir ma.

¹⁷ Paşê Sîdqiyayê Padîşah şand pey wî. Gava Yêremya hat, Padîşah li qesra xwe bi dizî jê pirsî: “Gelo ji Xudan gotinek heye?” Yêremya got: “Belê! Tê bikevî destê Padîşahê Babîlê!”

¹⁸ Wî berdewam kir û ji Sîdqiyayê Padîşah pirsî: “Min çi sûc li dijî te, li dijî xulamên te û li dijî gel kiriye ku te ez avêtim zîndanê?

¹⁹ Ka pêxemberên te ku digot: Wê Padîşahê Babîlê êrîşê te û vî welatî neke, li ku ne?

²⁰ Ya xweyê min padîşah! Hêvî dikim guh bide min. Lavakirina min qebûl bike û min careke din venegerîne mala Yonatanê Nivîsende. Ez naxwazim li wir bimirim.”

²¹ Li ser vê yekê Sîdqiyayê Padîşah emir da ku Yêremya bixin hewşa parêzvanan. Heta ku li bajêr nan hebû, wan her roj ji Kuçeya Nanpêjan nanekî da wî. Bi vî awayî Yêremya li hewşa parêzvanan ma.