Yêremya 36 - Kurmanji Încîl

Yehoyaqîmê Padîşah nivîsê dişewitîne

¹ Di çarsaliya padîşahiya Yehoyaqîmê kurê Yoşiyayê Padîşahê Cihûdayê de ev gotina Xudan ji Yêremya re hat û got:

² “Tomarekê hilde û hemû gotinên min ên ji rojên Yoşiya vir ve li dijî gelên Îsraêl û Cihûda û miletên din ji te re gotin, binivîse.

³ Dibe ku gava Mala Cihûda tevahiya xerabiya ez difikirim ku bînim serê wan bihîst, hemûyan dev ji riya xwe ya xerab berde ku ez jî neheqî û gunehên wan bibexişînim.”

⁴ Yêremya gazî Barûkê kurê Nêriya kir. Barûk jî, ji devê Yêremya hemû gotinên ku Xudan jê re gotine li ser tomarekê nivîsî.

⁵ Piştre Yêremya li Barûk emir kir û got: “Ez girtî me, ez nikarim herim Mala Xudan.

⁶ Loma tu here û rojeke rojiyê, ji gelê li Mala Xudan re ji tomara ku te ji devê min nivîsîne, gotinên Xudan bixwîne. Tê ji Cihûdayiyên ku ji bajaran hatine re jî bixwînî.

⁷ Dibe ku ew ji Xudan re lava bikin û hemû dev ji riya xwe ya xerab berdin. Çimkî hêrs û xezeba ku Xudan li dijî vî gelî gotiye dijwar e.”

⁸ Wê gavê Barûkê kurê Nêriya her tiştê ku Yêremyayê Pêxember lê emir kiriye pêk anî û li Mala Xudan ji vê nivîsê gotinên Xudan xwendin.

⁹ Di meha nehan a pêncsaliya padîşahiya Yehoyaqîmê kurê Yoşiyayê Padîşahê Cihûdayê de hemû gelê Orşelîmê û hemû Cihûdayiyên ku ji bajaran hatine Orşelîmê li hizûra Xudan rojiyek îlan kir.

¹⁰ Wê gavê Barûk li Mala Xudan gotinên Yêremya ji nivîsê ji tevahiya gel re xwendin. Wî li devê Dergehê Nû yê Mala Xudan, li odeya Gemaryayê kurê Şafanê Nivîsende yê ku li hewşa jorîn e, ew xwendin.

¹¹ Gava Mîxayayê kurê Gemaryayê kurê Şafan tevahiya gotinên Xudan ji nivîsê bihîst,

¹² ew berjêr bû hat odeya nivîsendeyê qesrê. Hemû serek li wir rûdiniştin: Êlîşamayê Nivîsende, Delayayê kurê Şemaya, Êlnatanê kurê Exbor, Gemaryayê kurê Şafan, Sîdqiyayê kurê Hananya û hemû serekên din.

¹³ Mîxaya tevahiya gotinên Barûk bihîst û ji wan re ragihand ku wî ji nivîsê xwend û gel bihîst.

¹⁴ Li ser vê yekê hemû serekan Yehûdiyê kurê Natanyayê kurê Şelemyayê kurê Kûşî şand ba Barûk. Wî ji Barûk re got: “Tomara ku te ji gel re xwend hilde û were.” Li ser vê yekê Barûkê kurê Nêriya tomar hilda û hat.

¹⁵ Wan jê re got: “Niha rûne û ji me re jî bixwîne.” Barûk ji wan re xwend.

¹⁶ Gava hemû gotin bihîstin, wan bi tirs li hev mêze kir û ji Barûk re got: “Divê em esse tevahiya van gotinan bi padîşah bidin bihîstin.”

¹⁷ Paşê wan ji Barûk pirsî û got: “Niha ji me re bêje, te tevahiya van gotinan çawa ji devê wî nivîsîn?”

¹⁸ Wî got: “Wî tevahiya van gotinan ji devê xwe ji min re gotin, min jî bi hibrê li ser nivîsî.”

¹⁹ Serekan ji Barûk re got: “De rabe! Tu û Yêremya xwe veşêrin. Bila kes nizanibe hûn li ku ne.”

²⁰ Piştî ku wan tomar li odeya Êlîşamayê Nivîsende veşart, ew çûn hewşê ba padîşah. Wan hemû tişt ji padîşah re gotin.

²¹ Padîşah Yehûdî şand ku tomarê bîne. Wî ew ji odeya Êlîşamayê Nivîsende hilda û anî. Yehûdî ew ji padîşah û hemû serekên li ba wî re xwend.

²² Di vê navberê de padîşah li mala xwe ya zivistanê rûdinişt û li ber wî tenûr hebû ku dişewitî. Çimkî meha nehan bû.

²³ Yehûdî sê-çar stûn dixwendin û padîşah bi gûzanê ew dibirîn û diavêtin nav agirê tenûrê. Bi vî awayî tevahiya tomarê di agirê tenûrê de şewitî.

²⁴ Padîşah û xulamên wî bi bihîstina van gotinan netirsiyan, ne jî cilên xwe çirandin.

²⁵ Tevî ku Êlnatan, Delaya û Gemarya ji padîşah lava kir ku tomarê neşewitîne jî, wî guh neda wan.

²⁶ Padîşah li Yerahmeyêlê kurê xwe, Serayayê kurê Ezriyêl û Şelemyayê kurê Evdeyêl emir kir ku Barûkê Nivîsende û Yêremyayê Pêxember bigirin. Lê Xudan ew veşartibûn.

²⁷ Piştî ku padîşah tomara gotinên ku Barûk ji devê Yêremya nivîsandin şewitand, gotina Xudan ji Yêremya re hat û got:

²⁸ “Tomareke din hilde û hemû gotinên di tomara pêşî de bûn, careke din li ser binivîse ku Yehoyaqîmê Padîşahê Cihûdayê şewitand.

²⁹ Herwiha tê li dijî Yehoyaqîmê Padîşahê Cihûdayê bêjî: ‘Xudan wiha dibêje: Te ev tomar şewitand û got: Te çima nivîsî ku wê esse Padîşahê Babîlê bê, vî welatî wêran bike û wê mirov û heywanan jî, ji holê rake?’

³⁰ Loma Xudan li ser Yehoyaqîmê Padîşahê Cihûdayê wiha dibêje: ‘Wê kesek jê tunebe ku li ser textê Dawid rûne. Wê cendekê wî bavêjin ber germa rojê û serma şevê.

³¹ Ji ber neheqiya wan, ezê wî, ziriyeta wî û xulamên wî ceza bikim. Ezê hemû xerabiyê bi ser wan, gelê Cihûda û şêniyên Orşelîmê de bînim ku min li dijî wan got û wan guh nedayê.’”

³² Li ser vê yekê Yêremya tomareke din hilda û da Barûkê Nivîsende yê kurê Nêriya û Barûk hemû gotinên tomara ku Yehoyaqîmê Padîşahê Cihûdayê avêt êgir û şewitand, ji devê Yêremya careke din nivîsî. Gelek gotinên mîna wan li ser wan jî hatin zêdekirin.