Yêremya 35 - Kurmanji Încîl

Mînaka dilsoziya Rêxaviyan

¹ Di rojên Yehoyaqîmê kurê Yoşiyayê Padîşahê Cihûdayê de gotina Xudan ji Yêremya re hat û got:

² “Here Mala Rêxav û bi wan re bipeyive. Wan bîne odeyeke Mala Xudan û şerabê bide wan.”

³ Wî çaxî min Yaazanyayê kurê Yêremyayê kurê Havassînya, birayên wî, hemû kurên wî û tevahiya Mala Rêxav hildan

⁴ û birin Mala Xudan, odeya kurên zilamê Xwedê Hananê kurê Yîgdalya. Ew ode li kêleka odeya serekan, li ser odeya Maesêyayê dergevanê kurê Şallûm bû.

⁵ Min cerên tije şerab û tas danîn ber Rêxaviyan û ji wan re got: “Kerem bikin, şerabê vexwin.”

⁶ Wan got: “Em şerabê venaxwin, çimkî bavkalê me Yehonadavê kurê Rêxav li me emir kir û got: ‘Hûnê tu caran şerabê venexwin, ne hûn ne jî kurên we.

⁷ Herwiha hûnê xaniyan ava nekin, tov navêjin û rez daneyînin. Hûnê nebin xweyê van tiştan. Di tevahiya rojên xwe de di konan de rûnin ku li welêt emrê we dirêj be.’

⁸ Me guhdariya dengê bavkalê xwe Yehonadavê kurê Rêxav kir ku li me emir kir. Ne me, ne jinên me, ne jî kur û keçên me tu caran şerab venexwar,

⁹ ne jî xanî ava kir ku em tê de rûnin. Rez, zevî û axa me jî tuneye.

¹⁰ Em di konan de rûdiniştin. Me guhdariya Yehonadavê bavkalê xwe kir. Me her tiştê ku li me emir kir pêk anî.

¹¹ Lê gava Nebûxadnessarê Padîşahê Babîlê êrîşî welêt kir, me got: ‘Werin em ji ber artêşên Kildanî û Aramiyan herin Orşelîmê.’ Loma em li Orşelîmê dimînin.”

¹² Gotina Xudan ji Yêremya re hat û got:

¹³ “Xwedayê Îsraêl Xudanê Karîndar wiha dibêje: ‘Here ji gelê Cihûda û şêniyên Orşelîmê re bêje: Ma hûn nikarin terbiye bin û guhdariya gotinên min bikin?’” Ev e gotina Xudan.

¹⁴ “‘Yehonadavê kurê Rêxav li kurên xwe venexwarina şerabê emir kir û wan emrê wî pêk anî. Heta îro jî ew şerabê venaxwin û guhdariya emrê bavkalê xwe dikin. Min gelek caran ji we re got, lê we guhdariya min nekir.

¹⁵ Min gelek caran xulamên xwe yên pêxember ji we re şandin û got: Bila herkes xwe ji riyên xwe yên xerab bide alî û karên xwe sererast bike. Li pey îlahan neçin û xulamiya wan nekin. Wî çaxî hûnê li welêt rûnin ku min da bav û kalên we. Lê belê we guh neda û guhdariya min nekir.

¹⁶ Ziriyeta Yehonadavê kurê Rêxav emrê ku bavkalê wan li wan kir pêk anî, lê vî gelî guhdariya min nekir.’

¹⁷ “Loma Xwedayê Îsraêl Xwedayê Karîndar Xudan wiha dibêje: ‘Va ye, ezê hemû xerabiya ku min li dijî gelê Cihûda û hemû şêniyên Orşelîmê got, bişînim ser wan. Çimkî min ji wan re got, lê wan guhdarî nekir. Min gazî wan kir, lê wan bersiv neda.’”

¹⁸ Yêremya ji Mala Rêxav re got: “Xwedayê Îsraêl Xudanê Karîndar wiha dibêje: ‘We guhdariya Yehonadavê bavkalê xwe kir. Her emrê ku wî kir pêk anî.’

¹⁹ Loma Xwedayê Îsraêl Xudanê Karîndar wiha dibêje: ‘Wê zilamên ziriyeta Yehonadavê kurê Rêxav tu caran ji hizûra min kêm nebin.’”