Yêremya 30 - Kurmanji Încîl

Vegerîna firehiya berê

¹ Gotina Xudan ku ji Yêremya re hat ev e:

² “Xwedayê Îsraêl Xudan wiha dibêje: ‘Hemû gotinên min ji te re gotin ji bo xwe di nivîsekê de binivîse.’”

³ Çimkî gotina Xudan ev e: “‘Va ye roj tên ku ezê gelê xwe Îsraêl û Cihûdayê vegerînim firehiya berê’” dibêje Xudan. “‘Ezê wan vegerînin welatê min daye bav û kalên wan ku ji xwe re bikin milk.’”

⁴ Gotinên ku Xudan li ser gelê Îsraêl û gelê Cihûda gotin, ev in.

⁵ Xudan wiha dibêje: “Me dengê dehşet û lerizînê bihîst, Aştî tuneye.

⁶ Niha bipirsin û bibînin, Ma mêrek zarokan tîne?! Nexwe çima her mêr bi destê xwe zikê xwe digire? Ez ji bo çi wan wekî jina zarok tîne dibînim? Çima hemû rû çilmisî ne?

⁷ Ax! Ew roj gelek tirsdar e, Roja wekî wê tuneye. Ji bo Aqûb, dema tengasiyê ye, Lê wê jê rizgar bibe.”

⁸ Gotina Xudanê Karîndar ev e: “Wê rojê ezê nîrê wî yê stûyê te bişikênim Û benên wî biqetînim. Êdî wê xerîb wan ji xwe re nekin kole.

⁹ Lê wê xulamiya Xwedayê xwe Xudan Û Dawidê Padîşahê ku ezê deynim ser wan bikin.”

¹⁰ Gotina Xudan ev e: “Lê Aqûbê xulamê min, netirse! Îsraêlo, neşikê! Çimkî va ye, ezê te ji dûrî Û ziriyeta te ji welatê sirgûnbûna wan rizgar bikim. Wê Aqûb vegere, aramî û bêxemiyê bibîne. Wê kesê wî bilerizîne tunebe.

¹¹ Çimkî ez bi te re me ku te rizgar bikim.” Ev e gotina Xudan. “Tevî ku ez hemû miletên ku min tu li nav wan belav kirî, Bi tevahî biqedînim jî, Ezê te bi tevahî neqedînim. Ezê te bi pîvana adil terbiye bikim Û te bêceza nehêlim.”

¹² Çimkî Xudan wiha dibêje: “Birîna te şifayê nabîne, Derba te bêderman e.

¹³ Kesê ku li doza te dinêre tuneye, Dermanê birîna te tuneye. Tuneye şifaya te.

¹⁴ Hemû yarên te, tu ji bîr kirî, Li te nagerin. Çimkî ji ber mezinbûna sûcê te Û zêdebûna gunehên te, Min bi derba dijminan Û bi cezayê zaliman li te xist.

¹⁵ Çima tu ji ber birîna xwe dikî feryad? Derba te bêderman e. Ji ber mezinbûna sûcê te Û zêdebûna gunehên te, Min ev yek anî serê te.

¹⁶ Loma hemû kesên te daqurtînin wê bên daqurtandin Û hemû neyarên te herin sirgûnê. Wê kesên te talan dikin bên talankirin, Ezê kesên ku te dişelînin bidim şelandin.

¹⁷ Çimkî ezê dîsa te baş bikim Û şifayê bidim derbên te.” Ev e gotina Xudan. “Çimkî wan got: ‘Ew ji Siyonê re sirgûn dibêjin. Êdî tu kes lê napirse.’”

¹⁸ Xudan wiha dibêje: “Va ye ezê konên Aqûb vegerînim firehiya berê Û li ber warên wî bikevim. Wê bajar li ser xirbeyekî demên berê ji nû ve ava bibe Û qesir li cihê xwe yê heq rûne.

¹⁹ Wê dengê ken û şahiyê ji nav wan bê. Ezê wan zêde bikim, wê kêm nebin, Ezê wan rûmet bikim, wê neyên kêmdîtin.

²⁰ Wê zarokên wan wekî demên berê bin, Civata wan li hizûra min qewîn be. Ezê hemû zordarên wan ceza bikim.

²¹ Wê mezinê wan ji wan be, Wê serwerê wan ji nav wan were. Ezê wî bînim ba xwe, wê nêzîkî min be. Gava ez nexwazim, wê kî biwêre nêzîkî min bibe?” Ev e gotina Xudan.

²² “Hûnê bibin gelê min, Ezê bibim Xwedayê we.

²³ Va ye, bagera Xudan! Xezeba wî rabû! Bahoza dijwar rabû ku bi serê xeraban de biteqe.

²⁴ Heta Xudan armanca dilê xwe pêk anî û xilas kir, Wê hêrsa wî ya dijwar danekeve. Di rojên pêş de hûnê vê fêm bikin.”