Yêremya 29 - Kurmanji Încîl

Yêremyayê Pêxember nameyekê ji sirgûniyan re dişîne

¹ Gotinên nameya Yêremyayê Pêxember ev in ku wî ji Orşelîmê ji rîspiyên sirgûnbûyî yên saxmayî, kahin, pêxember û tevahiya gelê ku Nebûxadnessar ji Orşelîmê sirgûnê Babîlê kiribû re şand.

² Piştî ku Yehoyaxînê Padîşah, şahbanûya diya wî, karmendên qesrê, serekên Cihûda û Orşelîmê, hoste û hesinkar ji Orşelîmê çûn, ev name hate nivîsandin.

³ Name bi destê Êlesayê kurê Şafan û Gemaryayê kurê Hîlqiya hate şandin ku Sîdqiyayê Padîşahê Cihûdayê ew şandibûn Babîlê, ba Nebûxadnessarê Padîşahê Babîlê. Gotinên nameyê ev bûn:

⁴ Xwedayê Îsraêl Xudanê Karîndar ji hemû sirgûniyên ku wî ji Orşelîmê şandine Babîlê re wiha dibêje:

⁵ “Xaniyan ava bikin û tê de rûnin! Bexçeyan deynin û berên wan bixwin.

⁶ Jinan ji xwe re bînin, bibin bavê kur û keçan. Jinan ji kurên xwe re bînin û keçên xwe bidin mêr. Bila ew jî bibin dê û bavê kur û keçan. Li wir zêde bibin, kêm nebin.

⁷ Xêrxwazê wî bajarî bin ku min hûn şandin wir. Ji bo wî bajarî ji Xudan re duayan bikin. Çimkî bi xêra wî, hûnê jî xêrê bibînin.”

⁸ Çimkî Xwedayê Îsraêl Xudanê Karîndar wiha dibêje: “Bila falbaz û pêxemberên di nav we de, we nexapînin. Guh nedin xewnên wan.

⁹ Çimkî ew bi navê min ji we re pêxemberiya derewîn dikin. Min ew neşandine.” Ev e gotina Xudan.

¹⁰ Çimkî Xudan wiha dibêje: “Gava heftê salên Babîlê temam bû, ezê bala xwe bidim we. Ezê soza xwe ya baş pêk bînim û we vegerînim vir.

¹¹ Çimkî ez pîlanên xwe yên ji bo we dizanim.” Ev e gotina Xudan. “Ev ne pîlanên xerabiyê ne, lê pîlanên xêrê ne ku pêşeroja hêviyê bidin we.

¹² Loma gava hûn gazî min bikin, gava hûn werin ji min re duayan bikin, ezê guhdariya we bikim.

¹³ Hûnê li min bigerin. Lê gava hûn bi hemû dilê xwe li min bigerin, hûnê min bibînin.

¹⁴ Ezê bikim ku hûn min bibînin.” Ev e gotina Xudan. “Ezê we vegerînim firehiya we ya berê û ji nav hemû miletan û hemû derên ku min hûn derxistine, bicivînim.” Ev e gotina Xudan. “Ezê we dîsa bînim dera ku min hûn jê sirgûn kiribûn.”

¹⁵ Ji ber ku we got: “Xudan li Babîlê ji bo me pêxember kifş kirin,”

¹⁶ Xudan ji bo padîşahê li ser textê Dawid rûdine, hemû gelê ku li vî bajarî rûdine û birayên we yên ku bi we re neçûne sirgûnê wiha dibêje.

¹⁷ Erê, Xudanê Karîndar wiha dibêje: “Va ye! Ezê şûr, kul û xelayê bînim ser wan. Ezê wan bikim wekî hejîrên riziyayî ku ji xerabûnê nayên xwarin.

¹⁸ Ezê bi şûr, kul û xelayê li pey wan bikevim ku di nav hemû padîşahiyên dinyayê de bibin mijara sawê. Di nav hemû miletên ku min ew sirgûn kirin de, wê bibin nalet, mijara saw û riswabûneke ku mirov lê bifîkînin.

¹⁹ Çimkî wan guhdariya gotina min nekir.” Ev e gotina Xudan. “Min gelek caran bi riya xulamên xwe yên pêxember gotinên xwe ji we re şandin. Lê we guhdarî nekir.” Ev e gotina Xudan.

²⁰ Ya hûn hemû sirgûniyên ku min ji Orşelîmê şandine Babîlê, guh bidin gotina Xudan!

²¹ Xwedayê Îsraêl Xudanê Karîndar li ser Ahavê kurê Qolaya û Sîdqiyayê kurê Maesêya yê ku bi navê min pêxemberiya derewîn dikin, wiha dibêje: “Va ye ezê wan bidim destê Nebûxadnessarê Padîşahê Babîlê û wê li ber çavê we wan bikuje.

²² Ji ber ya ku wê were serê wan, wê hemû sirgûniyên gelê Cihûda yên li Babîlê vê naletê bêjin: ‘Bila Xudan te bike wekî Ahav û Sîdqiyayê ku Padîşahê Babîlê ew di nav êgir de pijandin.’

²³ Çimkî wan li welatê Îsraêl kirêtî kir. Wan bi jinên cîranên xwe re zinayê kir! Wan bi navê min peyvên derewîn gotin ku min li wan emir nekiribûn. Yê ku dizane û şahid e, ez im.” Ev e gotina Xudan.

Yêremyayê Pêxember bi nameyekê bersiva Şemayayê Nehelamî dide

²⁴ Xudan got: “Tê ji Şemayayê Nehelamî re bêjî:

²⁵ ‘Xwedayê Îsraêl Xudanê Karîndar wiha dibêje: Te bi navê xwe ji tevahiya gelê Orşelîmê, Sefanyayê Kahin ê kurê Maesêya û tevahiya kahinên din re name şandiye. Gotinên nameyê ev bûn:

²⁶ “‘Yê ku di cihê Yehoyada de tu kirî kahin, Xudan e! Bi vî awayî wê li Mala Xudan peywirdar hebin ku her dînê wekî pêxember tevdigere, bi singî ve girê bidî û wî bixî bin qeyd û nîrê hesin.

²⁷ Lê te çima erzê Yêremyayê Enatotî neşikand ku xwe ji we re kiriye pêxember?

²⁸ Çimkî Yêremya xeber şand Babîlê û ji me re got: Wê sirgûnî dirêj be. Xaniyan ava bikin û tê de rûnin, bexçeyan deynin û berên wan bixwin.’”

²⁹ Sefanyayê Kahin ev name di guhê Yêremyayê Pêxember de xwend.

³⁰ Wê gavê gotina Xudan ji Yêremya re hat û got:

³¹ “Ji hemû sirgûniyan re xeber bişîne û bêje: ‘Xudan li ser Şemayayê Nehelamî wiha dibêje: Tevî ku min ew ji we re neşandibû, Şemaya ji we re pêxemberî kir û hişt ku hûn xwe bispêrin derewan.

³² Loma Xudan wiha dibêje: Ezê Şemayayê Nehelamî û ziriyeta wî ceza bikim. Wê tu kesekî wî di nav vî gelî de nemîne. Û qenciya ezê bi gelê xwe bikim jî nebîne.’” Ev e gotina Xudan. “‘Çimkî wî gotinên serhildanê yên li dijî Xudan kirin.’”