Yêremya 28 - Kurmanji Încîl

Hananyayê pêxemberê derewîn

¹ Wê salê, di destpêka padîşahiya Sîdqiyayê Padîşahê Cihûdayê de, di meha pêncan a sala çaran de, Hananyayê Pêxember ê kurê Ezzûrê Gîvonî, li Mala Xudan, li ber kahin û tevahiya gel ji min re got:

² “Xwedayê Îsraêl Xudanê Karîndar wiha dibêje: ‘Min nîrê Padîşahê Babîlê şikand.

³ Di navbera du salan de ezê hemû taximên Mala Xudan ên ku Nebûxadnessarê Padîşahê Babîlê ji vir hilda û bir Babîlê, vegerînim.

⁴ Ezê Yehoyaxînê kurê Yehoyaqîmê Padîşahê Cihûdayê û hemû sirgûniyên Cihûdayî yên ku çûne Babîlê dîsa vegerînim.’ Ev e gotina Xudan. ‘Çimkî ezê nîrê Padîşahê Babîlê bişikênim.’”

⁵ Wê gavê Yêremyayê Pêxember li pêş kahin û tevahiya gelê ku li ber Mala Xudan disekinîn bersiva Hananyayê Pêxember da.

⁶ Yêremyayê Pêxember got: “Amîn! Bila Xudan bike! Bila Xudan gotinên ku te li ser pêxemberî kir pêk bîne û taximên Mala Xudan û hemû sirgûniyan ji Babîlê vegerîne vir.

⁷ Lê niha van gotinan bibihîze ku ezê di guhê te û di guhê tevahiya gel de dibêjim:

⁸ Pêxemberên ku beriya min û beriya te hebûn, gelek sal berê li dijî gelek welat û padîşahiyên mezin li ser şer, kul û belayê pêxemberî dikir.

⁹ Dema pêxemberek li ser aştiyê pêxemberiyê bike û pêxemberiya wî pêk were, tenê wî çaxî tê zanîn ew pêxemberekî ku Xudan bi rastî şandiye.”

¹⁰ Li ser vê yekê Hananyayê Pêxember nîr ji stûyê Yêremyayê Pêxember derxist û şikand.

¹¹ Hananya li pêş tevahiya gel got: “Xudan wiha dibêje: ‘Di navbera du salan de ezê nîrê Nebûxadnessarê Padîşahê Babîlê ji stûyê hemû miletan bi vî awayî derxim û bişikênim.’” Yêremyayê Pêxember rabû çû.

¹² Piştî Hananyayê Pêxember nîrê di stûyê Yêremyayê Pêxember de şikand, gotina Xudan ji Yêremya re hat û got:

¹³ “Here ji Hananya re bêje: ‘Xudan wiha dibêje: Te nîrê darîn şikand û di şûna wî de nîrê hesin çêkir!

¹⁴ Çimkî Xwedayê Îsraêl Xudanê Karîndar wiha dibêje: Min nîrê hesin xist stûyê van hemû miletan ku xulamiya Nebûxadnessarê Padîşahê Babîlê bikin. Wê esse jê re xulamiyê bikin. Min heywanên çolê jî dan wî.’”

¹⁵ Yêremyayê Pêxember ji Hananyayê Pêxember re got: “Hananyayo, guh bide min! Xudan tu neşandî û te kir ku ev gel xwe bispêre derewan.

¹⁶ Loma Xudan wiha dibêje: ‘Ezê te ji ser rûyê erdê bişînim. Ji ber ku te li dijî Xudan hînê serhildanê kir, tê îsal bimirî.’”

¹⁷ Hananyayê Pêxember di meha heftan a wê salê de mir.