Yêremya 1 - Kurmanji Încîl

¹ Gotinên Yêremyayê kurê Hîlqiya yê ku ji kahinên bajarê Enatota welatê Binyamîniyan bû, ev in.

² Gotina Xudan di rojên Yoşiyayê kurê Amonê Padîşahê Cihûdayê de, di sêzdeh saliya padîşahiya wî de ji Yêremya re hat.

³ Herwiha gotina Xudan, di rojên Yehoyaqîmê Padîşahê kurê Yoşiyayê Cihûdayê de û heta dawiya meha pêncan a sala yanzdehan a Sîdqiyayê Padîşahê kurê Yoşiya ango heta sirgûnkirina gelê Orşelîmê jê re hat.

Yêremyayê Pêxember gazinan ji Xwedê dike

⁴ Gotina Xudan ji min re hat û got:

⁵ “Beriya ku min di zikê dê de şikil da te, Min tu nas kirî. Beriya bûyîna te, min tu veqetandî Û ji miletan re kirî pêxember.”

⁶ Min got: “Ax, ya Reb Xudan! Ez bi rastî nizanim bipeyivim! Çimkî ez hê xort im.”

⁷ Xudan ji min re got: “Nebêje: ‘Ez hê xort im.’ Tê herî ba her kesê ku ez te bişînim û her tişta ez li te emir dikim, tê bêjî.

⁸ Ji wan netirse. Çimkî ez bi te re me ku te rizgar bikim.” Ev e gotina Xudan.

⁹ Xudan destê xwe dirêj kir, li devê min da û got: “Va ye, min peyvên xwe kirine devê te.

¹⁰ Binêre, min îro tu li ser milet û padîşahiyan kifş kirî ku tu ji kokê rakî û hilweşînî, tune bikî û xera bikî, ava bikî û daçikînî.”

Dîtiniyên li ser gazîkirina Yêremyayê Pêxember

¹¹ Gotina Xudan ji min re hat û got: “Yêremyayo! Tu çi dibînî?” Min got: “Ez guliyekî behîvê dibînim.”

¹² Xudan got: “Te baş dît. Bi rastî ez çavdêriya gotina xwe dikim ku pêk were.”

¹³ Gotina Xudan dîsa ji min re hat û got: “Tu çi dibînî?” Min got: “Ez beroşeke kelandî dibînim ku ji aliyê bakur ve xwar dibe.”

¹⁴ Xudan ji min re got: “Wê bela ji bakur, Bi ser hemû şêniyên welêt ve biherike.

¹⁵ Çimkî va ye, Ezê gazî hemû binemalên padîşahiyên bakur bikim.” Ev e gotina Xudan. “Wê bên û li ber dergehên Orşelîmê, Li ber hemû sûrên wê, Li ber hemû bajarên Cihûdayiyan, Textên xwe deynin.

¹⁶ Ji ber hemû xerabiyên wan, Ezê li dijî wan biryarên xwe bêjim. Çimkî wan dev ji min berda, Ji îlahan re bixûr pêxistin Û li ber karên destê xwe deverû çûn erdê.

¹⁷ “Lê tu pişta xwe girê bide! Rabe û her tiştê ezê li te emir bikim ji wan re bêje. Li ber wan neşikê, yan na ezê te li ber wan bidim şikandin.

¹⁸ Min jî îro tu li dijî tevahiya welêt, li dijî padîşahên Cihûdayê, li dijî serek û kahinên wan, li dijî gelê welêt kirî bajarekî bisûr, stûneke hesinî û dîwarekî tûncîn.

¹⁹ Wê li dijî te şer bikin, lê wê nikaribin te têk bibin. Çimkî ez bi te re me ku te rizgar bikim.” Ev e gotina Xudan.