Waiz 7 - Kurmanji Încîl

Şehrezayî rêber e

¹ Navê baş ji rûnê bêhnxweş, Roja mirinê ji roja bûyînê çêtir e.

² Çûna mala şînê ji çûna mala ziyafetê çêtir e, Çimkî dawiya her mirovî ev e, Bila herkes vê yekê bixe dilê xwe.

³ Keder ji kenînê çêtir e, Çimkî xemgînî mirov tekûz dike.

⁴ Dilê kesê şehreza li mala şînê ye, Lê dilê bêaqilan li mala şahiyê ye.

⁵ Erzşikandina kesên şehreza, Ji pesindana bêaqilan çêtir e.

⁶ Qirçîna hejikan di bin beroşê de çawa be, Kenê bêaqilan jî wisa ye. Ev jî pûç e.

⁷ Qezenca neheq, zilamê şehreza bêaqil dike Û bertîl dil xera dike.

⁸ Dawiya tiştekî ji destpêka wî çêtir e, Sebir, ji pozbilindiyê çêtir e.

⁹ Zû hêrs nebe, Çimkî hêrs di dilê bêaqilan de disitire.

¹⁰ Nepirse: “Çima rojên berê ji yên niha çêtir bûn?” Çimkî ev pirs ne bi şehrezayî ye.

¹¹ Şehrezayî bi qasî mîrasê baş e Û bi kêrî yên ku tavê dibînin tê.

¹² Şehrezayî sitar e, pere jî sitar e, Lê feydeya zanabûnê ev e Ku şehrezayî jiyana xweyê xwe diparêze.

¹³ Tu li karê Xwedê binêre, Ya ku wî xwar kiriye, kî dikare rast bike?

¹⁴ Di roja firehiyê de şa be, Lê di roja tengasiyê de bifikire Ku herdu roj jî, ji Xwedê ne. Mirov pê nizane, Ka wê di pêşerojê çi bibe.

Sirên jiyanê

¹⁵ Min di rojên xwe yên pûç de ev herdu tişt dîtin: Carna kesê rast heye, tevî rastiya xwe zû helak dibe, Carna jî kesê xerab heye, tevî xerabiya xwe dirêj dijî.

¹⁶ Îcar bi têra xwe rast û şehreza be, lê ne zêdetir. Ma ji bo çi tu xwe helak dikî?

¹⁷ Ne zêde xerab be, ne jî bêaqil. Ji bo çi tê bêwext bimirî?

¹⁸ Çêtir e ku tu yekê bigirî Û ji yê din jî destê xwe neşoyî, Çimkî wê mirovê Xwedêtirs ya rast bibîne.

¹⁹ Ji deh desthilatdarên ku li bajarekî ne, Şehrezayî şehrezayan hêzdartir dike.

²⁰ Li ser rûyê erdê kesekî rast tuneye ku qencî kiribe Û tu caran guneh nekiribe.

²¹ Guh nede her tiştê ku xelk dibêje, An na, tê çêrên xulamê xwe bibihîzî.

²² Tu bi xwe jî dizanî ku te jî, Gelek caran çêrî kesên din kirine.

²³ Min ev hemû bi şehrezayî ceribandin: Min got: “Ezê bibim şehreza,” Lê belê ew ji min zêde bû.

²⁴ Şehrezayî gelek dûr û pir kûr e, Ma kî dikare wê bibîne?

²⁵ Ez bi dilê xwe li şehrezayiyê digeriyam, Min lê kola ku ez sedemên li pişt tiştan bibînim. Ez geriyam ku fêm bikim xerabî bêaqilî ye, Ehmeqî jî dînîtî ye.

²⁶ Tiştên ku min dît ev in: Jina xerab ji mirinê tehltir e. Ew jin ku dilê wê dafik, Destên wê zincîr in. Zilamê ku bi dilê Xwedê ye, Ji wê direve û rizgar dibe, Lê kesê gunehkar dikeve destê wê.

²⁷ Îcar waiz dibêje: “Min ev dît: Ji bo ku ez sedemên pişt tiştan bibînim, Min yekê bi ser ya din ve danî.

²⁸ Lê tiştê ku ez lê digeriyam, min nedît: Ji nav hezaran min tenê zilamek dît, Di nav wan hemûyan de min jinek jî nedît.

²⁹ Îcar min tenê ev dît Ku Xwedê mirov rast afirandin, Lê ew li gelek dek û dolaban digeriyan.”