Waiz 4 - Kurmanji Încîl

Neheqiyên dinyayê

¹ Îcar ez zivirîm û min li hemû zilm û zordariyên li ser rûyê erdê tên kirin nihêrî. Min hêsirên bindestan dîtin, Kesê ku dilê wan aş bike tuneye. Hêz li aliyê zordaran e, Kesê ku li ber dilê wan dide tuneye.

² Min ji zindiyan bêtir Xweziya xwe bi miriyan anî, Mirî ji zindiyan bextewartir jî dîtin.

³ Lê yê ku hê nehatiye dinyayê Û karên xerab ên ku li ser rûyê erdê tên kirin nedîtiye, Ji herduyan dilgeştir e.

⁴ Min dît ku di bingeha her ked û serketinê de hesûdî heye. Ev jî pûç e û wek ketina pey bayê ye.

⁵ Rast e, yê bêaqil destê xwe nalebitîne Û mala xwe xera dike.

⁶ Mista tije ya bi rihetî, Ji kulma tije ya bi zehmetî Û ketina pey bayê çêtir e.

Bihayê hevalekî

⁷ Ez zivirîm û min li ser rûyê erdê tiştekî din ê pûç dît.

⁸ Zilamek tenê hebû, kesek din li ba wî nebû. Kurê wî û birayê wî jî tunebû, Dîsa jî bi şev û bi roj dixebitî Û çavên wî têr nedibûn. Ma gelo wî ji xwe re nedigot: “Ez ji bo kê bixebitim Û canê xwe ji şahiyê bêpar bihêlim?” Ev jî pûç û tiştekî xerab e.

⁹ Du kes ji kesekî çêtir in, Çimkî qezenca keda wan çêtir e.

¹⁰ Gava yek bikeve, wê yê din wî rake. Lê wey li wî ku bi tenê ye û dikeve, Kesê ku wî rake tuneye.

¹¹ Herwiha gava du kes bi hev re razin, wê hev germ bikin. Lê zilamê ku tenê radize, wê çawa germ bibe?

¹² Yek bi yekî dikare, Lê bi du kesan nikare. Tayê sêqat jî bi rihetî naqete.

Serketin pûç e

¹³ Xortê feqîr û şehreza, ji padîşahê bêaqil û kalbûyî yê ku êdî naşêwire çêtir e.

¹⁴ Dibe ku ew xort li welatê xwe bi feqîrî hatibe dinyayê û ji girtîgehê derketibe jî dikare bibe padîşah.

¹⁵ Lê min dît gava ew bû padîşah jî, gel li pey xortekî din ket ku wê bikeve cihê wî.

¹⁶ Her kes li pey wî ket lê piştî demekê ji padîşahiya wî jî razî neman. Bi rastî ev jî pûç e û wek ketina pey bayê ye.