Samûêl II, 8 - Kurmanji Încîl

Serketinên Dawidê Padîşah

¹ Piştî demekê Dawid Filîstî têk birin û kirin bin dest. Wî Meteg-Ammayê ji destê Filîstiyan stand.

² Wî Moavî jî têk birin. Wan bi awayekî dirêjkirî rêz kirin û bi benikê pîva. Herdu rêzên ku pîva kuşt, rêzek hemû sax hişt. Moavî bûn xulam û bacdarên Dawid.

³ Dawid, Hadadezerê kurê Rehovê Padîşahê Sovayê têk bir. Wî dixwest careke din padîşahiya xwe li Çemê Feratê ava bike.

⁴ Dawid hezar û heft sed siwarî û bîst hezar leşkerên peya jê girtin. Ji bilî sed hespên erebeyên şer, wî hemû hesp seqet kirin.

⁵ Gava Aramiyên Şamê ji bo ku piştgiriya Hadadezerê Padîşahê Sovayê bikin hatin, Dawid ji Aramiyan bîst û du hezar kes kuştin.

⁶ Paşê li welatê Aramiyên Şamê, leşkerên xwe bi cih kirin. Ew jî bûn xulam û bacdarên wî. Dawid bi ku ve çû Xudan ew bi ser xist.

⁷ Dawid mertalên zêr ên di destên fermandarên Hadadezer de hildan û ew birin Orşelîmê.

⁸ Herwiha ji Betah û Bêrotayê gelek tûnc talan kir ku ev herdu bajar di bin destê Hadadezer de bûn.

⁹ Gava Toiyê Padîşahê Hamayê bihîst ku Dawid hemû artêşa Hadadezerê têk bir,

¹⁰ wî Yoramê kurê xwe şand ba Dawidê Padîşah ku silavê bide wî û serketina wî ya li dijî Hadadezer pîroz bike. Çimkî Toî li dijî Hadadezer şer dikir. Di destê Yoram de diyariyên zêr, zîv û tûnc hebûn.

¹¹ Dawidê Padîşah ew diyarî, tevî zêr û zîvên ji hemû miletên ku têk biribûn, ji Xudan re bexişandin.

¹² Çimkî wî Aramî, Moavî, Emmonî, Filîstî û Emalêqî û Hadadezerê kurê Rehovê Padîşahê Sovayê talan kirin.

¹³ Nav û dengê Dawid bilind bû. Gava vegeriya li Geliyê Xwê hijdeh hezar Edomî kuştin.

¹⁴ Li her derên Edomê leşkerên xwe bi cih kirin. Hemû Edomî bûn xulamên Dawid. Xudan li her derî Dawid serfiraz kir.

Peywirdarên Dawidê Padîşah

¹⁵ Dawid li ser tevahiya gelê Îsraêl padîşahî kir. Wî rastî û edalet da gelê xwe.

¹⁶ Yoavê kurê Serûya serleşkerê artêşê bû. Yehoşafatê kurê Ahîlûd dîroknivîsê dewletê bû.

¹⁷ Sadoqê kurê Ahîtûv û Ahîmelekê kurê Aviyatar kahin bûn. Seraya nivîsende bû.

¹⁸ Benayayê kurê Yehoyada serekê Kerêtî û Peletiyan bû. Kurên Dawid jî kahin bûn.