Samûêl II, 6 - Kurmanji Încîl

Sindoqa Peymanê tînin Orşelîmê

¹ Dawid hemû zilamên bijare yên gelê Îsraêl civandin. Hejmara wan sî hezar kes bû.

² Dawid û artêşa wî rabûn çûn Baaleya Cihûdayê ku Sindoqa Xwedayê ku bi navê Xudanê Karîndar tê zanîn û li ser xerûban text çêkiriye, bînin.

^3-4 Sindoqa Xwedê, ji mala Avînadavê li ser gir hildan û danîn ser erebeyeke nû. Herdu kurên Avînadav, Ûzza û Ahyo erebeya nû ya ku Sindoqa Xwedê li ser bû, diajotin. Ahyo li pêşiya Sindoqê dimeşiya.

⁵ Dawid û tevahiya Mala Îsraêl li ber Xudan, bi hemû hêza xwe bi çeng, tembûr, def, zîl û zengilan şahî kir.

⁶ Dema gihîştin Bêndera Naxon ga terpilîn. Ûzza destê xwe dirêj kir ku Sindoqa Xwedê bigire.

⁷ Hêrsa Xudan li Ûzzayê ku bi bêrûmetî tevgeriya, rabû û wî li erdê xist. Ew li wir, li ba Sindoqa Xwedê mir.

⁸ Dawid hêrs bû ku Xudan li Ûzza xist. Ji wê rojê û pê ve ji vir re Peres-Ûzza tê gotin.

⁹ Dawid wê rojê ji Xudan tirsiya û got: “Çawa dibe ku Sindoqa Xudan tê ba min?”

¹⁰ Wî êdî nexwest ku Sindoqa Xudan bibe Bajarê Dawid, ba xwe. Wî ew bir mala Ovêd-Edomê Gatî.

¹¹ Sindoqa Xudan sê mehan li mala Ovêd-Edom Gatî ma. Xudan Ovêd-Edomê û hemû malbata wî pîroz kir.

¹² Ji Dawidê Padîşah re hat gotin: “Xudan ji ber Sindoqa Xwedê Ovêd-Edom, hemû malbata wî û her tiştê wî pîroz kir.” Bi vî awayî Dawid çû û Sindoqa Xwedê ji mala Ovêd-Edom bi kêfxweşî anî Bajarê Dawid.

¹³ Yên ku Sindoqa Xudan hildigirtin piştî ku şeş gav avêtin, Dawid gayek û golikekî dermale qurban kirin.

¹⁴ Dawidê ku kirasê kahintiyê yê kitan li xwe kiribû, li hizûra Xudan bi hemû hêza xwe direqisî.

¹⁵ Dawid û tevahiya Mala Îsraêl, bi qîrînên şahiyê û dengê boriyê, Sindoqa Xudan dianî.

¹⁶ Gava Sindoqa Xudan hat Bajarê Dawid, Mîkala keça Şawûl di pencereyê re nêrî. Dema wê dît Dawidê Padîşah li hizûra Xudan direqise û lotikan davêje, Mîkalê di dilê xwe de ew kêm dît.

¹⁷ Wan Sindoqa Xudan anî û li cihê wî, li nav konê ku Dawid ji bo wê çêkiriye danî. Dawid qurbanên aştiyê û şewitandinê pêşkêşî Xudan kirin.

¹⁸ Piştî ku Dawid qurbanên aştiyê û şewitandinê pêşkêş kirin, wî bi navê Xudanê Karîndar gel pîroz kir.

¹⁹ Wî li her kesekî ji civaka Îsraêl, çi jin çi mêr, nanek, bastîqê tirî û bastîqê xurmeyan belav kirin. Paşê hemû vegeriyan malên xwe.

²⁰ Gava Dawid ji bo pîrozkirina malbata xwe vegeriya, Mîkala keça Şawûl derket derve ku pêşwaziya wî bike. Ji Dawid re got: “Padîşahê gelê Îsraêl îro çi navekî xweş bi pey xwe xist! Mîna kesekî bêqîmet, te xwe li ber cariyeyên xulamên xwe tazî kir.”

²¹ Dawid got: “Ez li ber Xudan reqisîm. Çimkî wî ez li cihê bavê te û hemû ziriyeta wî hilbijartim û wekî serwer li ser gelê xwe Îsraêl şandim! Helbet ezê li ber Xudan bireqisim!

²² Bi ser de ezê xwe ji vê û zêdetir jî biçûk bixim, ezê di çavê xwe de nizim bim. Lê ew cariyeyên ku tu behsa wan dikî, wê min rûmetdar bikin.”

²³ Mîkala keça Şawûl heta roja mirinê jî zarok neanîn.