Samûêl II, 5 - Kurmanji Încîl

Dawid dibe padîşahê hemû gelê Îsraêl

¹ Hemû eşîrên Îsraêl çûn Hevronê û hatin ba Dawid. Wan jê re got: “Em xwîn û goştê te ne.

² Dema Şawûl padîşahê me bû, tu fermandarê gelê Îsraêl bûyî. Xudan ji te re got: ‘Tê bibî şivanê gelê min Îsraêl. Tê li ser gelê Îsraêl bibî serwer.’”

³ Hemû rîspiyên gelê Îsraêl li Hevronê hatin ba Dawidê Padîşah û wî li wir li ber Xudan bi wan re peymanek çêkir. Wan jî Dawid wekî Padîşahê gelê Îsraêl kifş kir.

⁴ Gava Dawid bû padîşah sî saliya bû. Wî çil salan padîşahî kir.

⁵ Li Hevronê heft sal û şeş mehan ji Cihûdayê re, li Orşelîmê jî sî û sê salan ji hemû Îsraêl û Cihûdayê re padîşahî kir.

⁶ Padîşah bi zilamên xwe re çû Orşelîmê ku êrîşî Yevûsiyên şêniyên bajêr. Yevûsiyan ji Dawid re got: “Tê nekevî vê derê! Kor û kulek jî dikarin zora te bibin.” Wiha difikirîn: “Dawid nikare bikeve vir.”

⁷ Lê Dawid asêgeha Siyonê bi dest xist. Paşê navê wê bû Bajarê Dawid.

⁸ Dawid wê rojê wiha got: “Her kî ku Yevûsiyan têk bibe, bila ew di coya avê re êrîşî ‘Kor û kulekan’ bike ku Dawid ji wan nefret dike.” Sedema ku dibêjin “Kor û kulek nikarin bikevin malê” ev e.

⁹ Dawid li asêgehê rûnişt. Ji ber vê yekê navê “Bajarê Dawid” lê kiribû. Wî ji Mîlloyê destpê kir, derdorê ber bi hêla hundir ve ava kir.

¹⁰ Her ku diçû hêza Dawid mezintir dibû. Xwedayê Karîndar Xudan pê re bû.

¹¹ Hîramê Padîşahê Sûrê ji Dawid re qasid, darên sedrê, necar û hosteyên keviran şandin ku ji bo Dawid qesrek çêkir.

¹² Bi vî awayî Dawid fêm kir ku Xudan ew li ser gelê Îsraêl kir padîşah û ji bo gelê wî Îsraêl padîşahiya wî mezin kir.

¹³ Piştî ku Dawid ji Hevronê vegeriya, li Orşelîmê ji xwe re zêdetir carî û jin anîn. Dawid careke din bû bavê kur û keçan.

¹⁴ Navê zarokên wî yên ku li Orşelîmê çêbûn ev in: Şammûa, Şovav, Natan, Silêman,

¹⁵ Yîvhar, Êlîşûa, Nefeg, Yafiya,

¹⁶ Êlîşama, Êlyada û Êlîfelet.

Filîstî têk diçin

¹⁷ Gava Filîstiyan bihîst ku Dawid li ser gelê Îsraêl wekî padîşah hatiye kifşkirin, hemû artêşa Filîstî ji bo li Dawid bigerin ketin rê. Gava Dawid bi vê yekê hesiya, ew çû asêgehê.

¹⁸ Filîstî hatibûn, li Deşta Refayîmê belav bûbûn.

¹⁹ Dawid ji Xudan pirs kir û got: “Ez êrîşî Filîstiyan bikim, tê wan bidî destê min?” Xudan jê re got: “Bike, ezê bêguman bidim destê te.”

²⁰ Li ser vê yekê Dawid çû Baal-Perasîmê û li wir Filîstî têk birin. Paşê wî got: “Çawa ku lehî hildiweşîne, Xudan jî dijminên min ji pêşiya min hilweşandin.” Ji ber vê yekê, navê wir danîn Baal-Perasîm.

²¹ Filîstiyan pûtên xwe li wir hiştin. Dawid û zilamên wî wan birin û çûn.

²² Filîstî careke din hatin, li Deşta Refayîmê belav bûn.

²³ Dawid ji Xudan pirsî. Xudan jê re got: “Ji vî alî ve êrîş neke! Wan ji paş ve dorpêç bike û li ber darên belesanê êrîşî wan bike.

²⁴ Dema te ji jora darên belesanê dengê meşê bihîst, bilezîne. Çimkî Xudan da pêşiya te û wê artêşa Filîstiyan têk bibe.”

²⁵ Çawa ku Xudan lê emir kiriye, Dawid wiha kir. Wî Filîstî ji Gevayê heta Gezerê têk birin.