Samûêl II, 4 - Kurmanji Încîl

Kuştina Îşboşet

¹ Îşboşetê kurê Şawûl li Hevronê bû û bi kuştina Avnêr tirsiya. Tevahiya gelê Îsraêl jî di nav tirsekê de bû.

² Du serekrêbirên Îşboşet hebûn. Ew kurên Rîmmonê Beêrotî bûn. Ji eşîra Binyamînî bûn. Navê yekî Baena, yê din Rêxav bû. Beêrot ji eşîra Binyamîn dihat hesibandin.

³ Beêrotî reviyabûn Gittayîmê. Heta îro jî li wir bi xerîbî dimînin.

⁴ Kurekî Yonatanê kurê Şawûl hebû ku navê wî Mefîboşet bû. Lingên wî kulek bûn. Dema xebera mirina Şawûl û Yonatan ji Yîzreyêlê gihîşt, Mefîboşet pênc salî bû. Dadika wî jî ew hilgirtibû û revandibû. Lê di lezandina revê de, zarok ketibû û kulek bûbû.

⁵ Rêxav û Baenayê kurên Rîmmonê Beêrotî, bi rê ketin. Dema di germa nîvro de gihîştin mala Îşboşet, Îşboşet pal dabû û bêhna xwe dida.

⁶ Çawa ku genim bistînin ketin nav malê. Wê demê Îşboşet li odeya razanê li ser cihê xwe, dirêjkirî bû.

⁷ Zilaman lê xist û ew kuşt. Wan serê wî jê kir û bi xwe re bir. Rêxav û Baenayê birayê wî reviyan û tevahiya şevê di riya Eravayê de meşiyan.

⁸ Serê Îşboşet anîn Hevronê ba Dawidê Padîşah û gotin: “Va ye serê Îşboşetê kurê Şawûlê dijminê te ku dixwest te bikuje! Xudan îro heyfa xweyê min padîşah ji Şawûl û ji ziriyeta wî stand.”

⁹ Lê Dawid ji kurên Beêrotê Rîmmonî, Rêxav û birayê wî Baena re got: “Ez bi navê Xudanê Jîndar ku canê min ji hemû tengasiyan rizgar kiriye,

¹⁰ dibêjim min zilamê ku mirina Şawûl ji min re aniye ku jê kirî xebereke baş aniye, zevt kir û li Zîqlagê kuşt. Xelata ku min ji bo wê xeberê dabûyê ev bû!

¹¹ Xilasiya mirina kesên xerab ku yekî rast li mala wî, di nav nivînên wî de kuştiye tuneye! Niha ezê we heyfa wî ji we nestînim û ji rûyê erdê rakim?”

¹² Paşê emir li zilamên xwe kir û herdu bira li wir hatin kuştin. Dest û piyên wan jêkirin û cendekê wan li kêleka hewza Hevronê daleqandin. Serê Îşboşet jî birin û li Hevronê di gora Avnêr de veşartin.