Samûêl II, 22 - Kurmanji Încîl

Strana serketina Dawidê Padîşah

¹ Çaxê Xudan Dawid ji destê Şawûl û hemû dijminên wî rizgar kir, Dawid ji Xudan re ev stran got.

² Wî got: “Xudan zinarê min, sitargeha min û xilaskarê min e.

³ Xwedayê min, zinarê min ê xwespartinê, Mertalê min, rizgarkarê min ê hêzdar, Sitargeha min û cihê reva min ew e! Xilaskarê min, ji zordestiyê tu min rizgar dikî.

⁴ Ez gazî dikim Xudanê hêjayî pesnan, Rizgar dibim ji dijminan.

⁵ Çimkî dora min pêçan pêlên mirinê, Ser min re avêtin lehiyên wêrankirinê.

⁶ Benên diyarê miriyan ez dorpêç kirim, Rastî kemînên mirinê hatim.

⁷ Min di tengasiya xwe de gazî Xudan kir, Gazî Xwedayê xwe kir. Ji Perestgeha xwe bihîst dengê min, Ket guhê wî hewara min.

⁸ Dinya lerizî û hejiya. Bingehên ezmanan leqiyan û lerizîn, Çimkî Xudan hêrs bûbû.

⁹ Dû ji pozê wî bilind bû, Ji devê wî agirê şewatê Û perengên êgir pijiqîn.

¹⁰ Ezman qelaşt û daket, Ewrên reş di bin lingên wî de bûn.

¹¹ Li xerûbekî siwar bû û firiya, Li ser baskên bayê xuya bû.

¹² Tariyê li xwe pêça. Ewrên reş ên baranê ser xwe kir holik.

¹³ Ji biriqîna hizûra wî Brûsk dipijiqîn.

¹⁴ Xudan ji ezmanan kir gurmîn, Deng da Yê Herî Berz.

¹⁵ Tîrên xwe avêt û dijminên xwe belav kirin, Bi brûskan ew têk birin.

¹⁶ Ji erzşikandina Xudan Kûrahiyên deryayê kifş bûn, Hilma pozê wî wekî bayekî xurt Bingeha dinyayê da xuyakirin.

¹⁷ Ji jor ve dirêjî min kir destê xwe Xudan, Ez girtim, ez deranîm ji boşahiya avan.

¹⁸ Wî ez ji dijminên min ên dijwar, Ji yên ku ji min nefret dikirin, rizgar kirim, Çimkî ew ji min hêzdartir bûn.

¹⁹ Di roja felaketê de derketin li dijî min, Lê Xudan bû piştgirê min.

²⁰ Wî ez derxistim firehiyê, Ez rizgar kirim, dilê wî ji min xweş bû.

²¹ Xudan berdêla rastiya min da, Li gorî paqijiya destên min, ez xelat kirim.

²² Çimkî ez di riya Xudan de meşiyam, Min xerabî nekir, ji Xwedayê xwe neqetiyam.

²³ Li pêş min in hemû qanûnên wî, Ez dûr neketime ji rê û rêbazên wî.

²⁴ Ez li ber wî bêqisûr bûm, Min xwe dûr kir ji sûcan.

²⁵ Ji ber vê yekê Xudan, li gorî rastiya min, Li gorî paqijiya min a li ber wî, ez xelat kirim.

²⁶ “Tu ji yê dilsoz re dilsoz î, Ji yê bêqisûr re bêqisûr î.

²⁷ Bi pakan re pak, Bi xwaran re dijwar î.

²⁸ Tu yî xilaskarê nefsbiçûkan, Çavê te lê ye ku tu daxî pozbilindan.

²⁹ Ya Xudan, tu yî qendîla min, Xudan ronî dike tariya min.

³⁰ Bi te ez êrîş dikim ser leşkeran, Bi Xwedayê xwe derbas dibim ji sûr û çeperan.

³¹ “Riya Xwedê temam û kamil e, Gotina Xudan xas e. Ew ji her kesê ku xwe dispêre wî re mertal e.

³² Ma ji xeynî Xudan, xwedê heye? Gelo ji xeynî Xwedayê me, zinar heye?

³³ Yê ku hêzê dide min Xwedê ye, Yê ku riya min rast dike ew e.

³⁴ Ew lingan dide min wekî lingên xezalan, Min hildikişîne bilindciyan.

³⁵ Ew destên min hîn dike ji bo şeran, Milên min ditewînin kevanê ji tûncan.

³⁶ “Tu mertalê rizgariyê didî min, Alîkariya te min bilind dike.

³⁷ Tu fireh dikî cihê gavên min, Loma nalikume lingê min.

³⁸ Ez li pey dijminên xwe ketim, min ew tune kirin, Ez nezivirîm heta ku ew neqediyan.

³⁹ Min ew qedandin û perçiqandin, êdî nikarin rabin, Ketin bin lingên min.

⁴⁰ Ji bo şer, te ez hêzdar kirim, Yên ku li dijî min rabûn, davêjî ber lingên min.

⁴¹ Te kir ku dijminên min birevin, Yên ku ji min nefret dikin, min ew tune kirin.

⁴² Wan kir hewar lê nebû rizgarkar, Gazî kirin Xudan lê bersiv neda wan.

⁴³ Min ew hûr û hela kirin wekî toza erdê, Di bin lingên xwe de perçiqandin wekî heriya kuçeyê.

⁴⁴ Te ez rizgar kirim ji pevçûna gelê min, Ji bo serweriya miletan te ez parastim. Miletên ku ez wan nas nakim, Ji min re xulamiyê dikin.

⁴⁵ Xerîb li ber min dibin erd û ax, Çawa dibihîzin, li ber min ta dibin.

⁴⁶ Reng û rûçikê wan avêt, Bi lerizîn ji asêgehên xwe derdikevin.

⁴⁷ “Xudanê Jîndar, Zinarê min pîroz be! Bila Xwedayê min, Zinarê rizgariya min, Di ser her tiştî re be!

⁴⁸ Ew, Xwedê ye ku distîne heyfa min, Miletan dike bin destê min.

⁴⁹ Min ji dijminên min azad dike, Min ji serhildêran mezintir dike, Min ji zordestan rizgar dike.

⁵⁰ Ya Xudan, ji ber vê, Ezê ji te re şikir bikim li nav miletan, Pesnê navê te bidim bi lavijan.

⁵¹ Xudan serketinên mezin dide padîşahê xwe. Ji bo kifşkiriyê xwe, ji bo Dawid û ziriyeta wî Her û her dilovan e.”