Samûêl I, 8 - Kurmanji Încîl

Gelê Îsraêl padîşahekî dixwaze

¹ Samûêl dema kal bû, kurên xwe kirin serwerên gelê Îsraêl.

² Kurê wî yê mezin Yoêl, kurê diduyan jî Aviya bû. Herdu jî li Beêr-Şevayê serwerî dikir.

³ Lê kurên wî di riya wî de nediçûn. Li pey kara xwe digeriyan, bertîl distandin û heq didan xwarin.

⁴ Li ser vê yekê hemû rîspiyên gelê Îsraêl civiyan û li Ramayê çûn ba Samûêl.

⁵ Jê re got: “Va ye tu êdî kal bûyî. Kurên te di riya te de nameşin. Were, tu jî wekî hemû miletan padîşahekî kifş bike ku bibe serwerê me.”

⁶ Lê ev yek ne bi dilê Samûêl bû. Ji ber ku wan gotibû: “Padîşahekî kifş bike ku bibe serwerê me.” Samûêl ji Xudan re dua kir.

⁷ Xudan ji Samûêl re got: “Guhdariya dengê gelê xwe bike û li gorî tevahiya gotina wan here. Çimkî ne tu, lê ez ji aliyê wan ve hatime redkirin.

⁸ Ji roja ku min ew ji Misrê deranîn heta niha, çi anîbin serê min ew anîne serê te jî. Wan dev ji min berda û xulamiya îlahan kir.

⁹ Guh bide dengê wan, lê wan bi awayekî eşkere hişyar bike. Behsa rêbaza serweriya wî padîşahî ji wan re bike ku wê bibe padîşahê wan.”

¹⁰ Samûêl hemû gotinên Xudan ji gel re got ku jê padîşahek dixwest.

¹¹ Wî got: “Kesê ku ji we re padîşahiyê bike wê serweriya wî wiha be: Wê kurên we deyne ser erebeyên şer û wan bike siwariyên xwe. Wê erebeya wî ya şer biparêzin.

¹² Hinek ji wan wê bibin serhezar û serpêncî. Wê hinek çandiniya wî bikin, hinek zeviyên wî rakin, hinek jî wê jê re çek û erebeyan çêkin.

¹³ Wê keçikên we hilde ji bo ku rûnên bêhnxweş tev bidin, xwarinê çêkin û nanpêjiyê bikin.

¹⁴ Wê zeviyên we yên baş, rezên we û bexçeyê zeytûnên we ji we bistîne û bide xizmetkarên xwe.

¹⁵ Wê ji deha yekê dexil û tiriyê we bistîne, li xulam û karmendên xwe belav bike.

¹⁶ Wê xulam û xadimên we, conegayên we yên herî qenc, kerên we hilde û ji bo xwe bide xebitandin.

¹⁷ Wê ji deha yekê pezê we hilde. Hûnê jî bibin koleyên wî.

¹⁸ Wê rojê ji ber padîşahê ku we hilbijartiye hûnê bikin hewar û zarîn. Lê wê Xudan guh nede we.”

¹⁹ Lê gel guhdariya dengê Samûêl nekir û got: “Na! Bila padîşahek li ser me hebe.

²⁰ Bi vî awayî emê jî bibin wekî miletên din. Padîşahê me wê serweriya me bike, wê li pêş me here şerên me birêve bibe.”

²¹ Samûêl guhdariya hemû gotinên milet kir û ew ji Xudan re gotin.

²² Xudan ji Samûêl re got: “Gotina dengê wan bike û padîşahekî li ser wan kifş bike.” Li ser vê yekê Samûêl ji gelê Îsraêl re got: “Bila herkes vegere bajarê xwe.”