Samûêl I, 7 - Kurmanji Încîl

¹ Gelê Qîryat-Yearîmê hat Sindoqa Xudan hilda û ew bir mala Avînadav ku li ser girekî bû. Ji bo ku xweyîtî li Sindoqa Xudan bike Êlezarê kurê Avînadav kifş kirin.

Samûêlê Pêxember ji gelê Îsraêl re pêşengî dike

² Sindoq demeke dirêj, bi qasî bîst salan li Qîryat-Yearîmê ma. Di wê navberê de tevahiya Mala Îsraêl bêriya Xudan kir.

³ Samûêl ji Mala Îsraêl re wiha got: “Heke hûn bi hemû dilê xwe û bi hemû canê xwe vegerin Xudan, îlahên xerîb û pûtên Eştoretê ji nav xwe rakin. Xwe bispêrin Xudan û bi tenê xulamiya wî bikin. Wê Xudan jî we ji destê Filîstiyan rizgar bike.”

⁴ Gelê Îsraêl pûtên Baal û Eştoretê avêtin û bi tenê dest bi xulamiya Xudan kirin.

⁵ Samûêl got: “Tevahiya gelê Îsraêl li Mîspayê kom bikin, ezê jî, ji bo we lavayî Xudan bikim.”

⁶ Gelê Îsraêl ku li Mîspayê kom bû, ji bîrê av derxist û li pêşiya Xudan rijand. Wê rojê rojî girtin û gotin: “Me li ber Xudan guneh kir.” Samûêl li Mîspayê serweriya gelê Îsraêl kir.

⁷ Gava Filîstiyan bihîst ku gelê Îsraêl li Mîspayê kom bûye, Begên wan li dijî gelê Îsraêl rabûn. Li ser vê yekê Îsraêlî tirsiyan.

⁸ Ji Samûêl re got: “Dev ji hewarkirinê bernede ku Xwedayê me Xudan, me ji destê Filîstiyan rizgar bike.”

⁹ Samûêl berxekî ji ber şîr hilda û bi tevahî wekî qurbana şewitandinê pêşkêşî Xudan kir. Wî ji bo gelê Îsraêl kir hewar û Xudan bersiv da.

¹⁰ Gava Samûêl ev yek dikir, Filîstî ji bo êrîşê nêzîk bûbûn. Lê Xudan wê rojê bi dengê bilind kir qîrîn û Filîstî pir tirsiyan. Ew li dijî gelê Îsraêl şikestin.

¹¹ Îsraêl ji Mîspayê derketin, heta Bêtkarê dane pey Filîstiyan û qira wan anîn.

¹² Samûêl kevirek hilda û di navbera Mîspa û Şênê de daçikand. “Xudan heta vir alîkariya me kiriye” got û navê Even-Êzer li vî kevirî kir.

¹³ Filîstiyên ku şikestin, careke din sînorê gelê Îsraêl derbas nekirin. Heta Samûêl sax bû, Xudan rê li ber êrîşên Filîstiyan girt.

¹⁴ Ji Eqron heta Gatê, bajar û derdora wan li gelê Îsraêl vegerandin ku ji destê Filîstiyan standibûn. Aştiya gelê Îsraêl û Amorî saz bû.

¹⁵ Heta Samûêl hebû, serweriya gelê Îsraêl kir.

¹⁶ Her sal li Bêt-Êl, Gîlgal û Mîspayê digeriya. Ji wan bajaran gelê Îsraêl birêve dibir.

¹⁷ Piştre vedigeriya mala xwe ya li Ramayê. Samûêl gelê Îsraêl ji wir birêve dibir. Wî li wir ji Xudan re gorîgehek çêkir.