Samûêl I, 5 - Kurmanji Încîl

Sindoqa Peymana dibin Aşdod û Eqronê

¹ Filîstiyan, piştî ku Sindoqa Xwedê desteser kirin, wê ji Even-Êzerê birin Aşdodê.

² Sindoqa Xwedê birin ber perestgeha Dagonê îlah, li kêleka peyker bi cih kirin.

³ Dotira rojê Aşdodî zû rabûn û wan dîtin ku Dagon serdevkî li ber Sindoqa Xudan ketiye erdê. Wan Dagon hilda, danî cihê wî.

⁴ Lê roja din, gava ew serê sibê zû rabûn, wan dîsa dît ku Dagon li ber Sindoqa Xudan serdevkî li erdê ye. Vê carê serê wî û herdu milên wî şikestibûn, li ber şêmîkê bû û bi tenê gewdeya wî mabû.

⁵ Kahinên Dagon û kesên din ku dihatin perestgeha wî, ji wê rojê heta niha pê li şêmîka Dagon a li Aşdodê nakin.

⁶ Xudan nexweşiyeke giran anî serê Aşdodiyan û gelên derdorê. Kunêr di laşê wan de derxistin û ew tengezar kirin.

⁷ Aşdodiyan li ser vê yekê wiha got: “Sindoqa Xwedayê Îsraêl divê li ba me nemîne, ji ber ku wê em jî, îlahê me Dagon jî bi awayekî giran ceza kir.”

⁸ Li ser vê yekê wan çend qasid şandin. Wan gazî tevahiya begên Filîstiyan kir û got: “Em çi ji Sindoqa Xwedayê Îsraêl bikin?” Began got: “Sindoqa Xwedayê Îsraêl bibin Gatê.” Bi vî awayî Sindoqa Xwedayê Îsraêl birin Gatê.

⁹ Piştî ku Sindoq birin Gatê, Xudan ew bajar jî ceza kir. Tirseke mezin ket nav bajêr. Xudan ji biçûkan bigire heta mezinan xelkê bajêr bi kunêran ceza kir.

¹⁰ Sindoqa Xwedê birin Eqronê. Lê gava hat Eqronê, gel kir hewar û got: “Ji bo ku me û gelê me tune bikin Sindoqa Xwedayê Îsraêl ji me re anîn!”

¹¹ Tevahiya begên Filîstiyan berhev kirin û gotin: “Sindoqa Xwedayê Îsraêl ji vir dûr bixin û bişînin cihê wê. Ji bo ku me û gelê me helak neke.” Çimkî tirsa mirinê ketibû her derê bajêr. Cezayê Xwedê pir giran bû.

¹² Kunêr di laşê saxan de derketin. Qîrîna bajariyan gihîşte ezmanan.