Samûêl I, 23 - Kurmanji Încîl

Dawid bajarê Qeîlayê rizgar dike

¹ Ji Dawid re xeber şand û got: “Filîstiyan êrîşî bajarê Qeîlayê kirine û tevahiya bênderên wan talan dikin.”

² Dawid bi Xudan şêwirî û got: “Ez herim êrîşî van Filîstiyan bikim?” Xudan bersiv da û got: “Here êrîşî Filîstiyan bike û bajarê Qeîlayê rizgar bike.”

³ Lê zilamên wî ji Dawid re got: “Binêre, gava em li vir, li Cihûdayê ne, em ditirsin. Gava em herin Qeîlayê, li dijî artêşa Filîstiyan şer bikin, emê bêtir bitirsin.”

⁴ Li ser vê yekê Dawid careke din bi Xudan şêwirî. Xudan jê re careke din got: “Rabe, here Qeîlayê! Çimkî ezê Filîstiyan bi destê xwe radestî te bikim.”

⁵ Bi vî awayî Dawid û zilamên li ber destê wî, çûn Qeîlayê, li dijî Filîstiyan şer kirin. Dawid heywanên wan bi dest xistin. Filîstiyan bi awayekî giran têk bir û şêniyên Qeîlayê rizgar kirin.

⁶ Dema Aviyatarê kurê Ahîmelek reviya û çû Qeîlayê ba Dawid, êfodê jî bi xwe re biribû.

Dawid dîsa ji ber Şawûlê Padîşah direve

⁷ Gava Şawûl bihîst ku Dawid çûye bajarê Qeîlayê, wî got: “Xwedê Dawid da destê min. Dawid ket bajarekî bi dergeh û zirze û bi vî awayî xwe hepis kir.”

⁸ Şawûl gaziya şer li tevahiya gel kir ku ber bi Qeîlayê ve bimeşin û Dawid û zilamên wî dorpêç bikin.

⁹ Gava Dawid fêm kir Şawûl li dijî wî fen çêkiriye, wî ji Aviyatarê Kahin re got: “Êfodê bîne.”

¹⁰ Piştre got: “Ya Xwedayê Îsraêl Xudan! Xulamê te bihîstiye ku Şawûl dixwaze were Qeîlayê û ji rûyê min qira bajêr bîne.

¹¹ Gelo wê gelê Qeîlayê min bide dest? Çawa ku xulamê te bihîstiye wê Şawûl were? Ya Xwedayê Îsraêl Xudan, ez lava dikim ji xulamê xwe re bêje!” Xudan bersiv da û got: “Wê Şawûl were.”

¹² Dawid ji Xudan pirsî: “Gelo wê gelê Qeîlayê min bide destê Şawûl?” Xudan got: “Wê bide!”

¹³ Li ser vê yekê Dawid û bi qasî şeş sed kesên li ba wî, ji Qeîlayê derketin û herkes bi aliyekî ve çû. Şawûl gava bihîst ku Dawid ji Qeîlayê reviyaye, neçû wir.

¹⁴ Dawid li sitargehan ma ku li herêma çiyayî ya Beriya Zîfê. Şawûl her roj lê digeriya, lê Xwedê Dawid nedida destê wî.

¹⁵ Dawid gava li Beriya Zîfê, li Horeşê bû, bihîst ku Şawûl daye pey kuştina wî.

¹⁶ Di vê navberê de Yonatanê kurê Şawûl rabû çû Horeşê ba Dawid û bi navê Xwedê hêz da wî.

¹⁷ Got: “Netirse! Bavê min Şawûl wê dest nede te. Tê bibî Padîşahê gelê Îsraêl, ezê jî bibim alîkarê te. Bavê min Şawûl jî vê yekê dizane.”

¹⁸ Her duyan jî, li ber Xudan peymana xwe nû kirin. Piştre Yonatan vegeriya mala xwe, lê Dawid li Horeşê ma.

¹⁹ Zîfî çûn Gîvayê ba Şawûl. Wan got: “Dawid di nav me de ye. Ew li başûrê Yeşîmonê, di sitargehên Horeşê ku li ser girê Haxîlayê ye xwe vedişêre.

²⁰ Ya padîşah, tu kengê dixwazî were! Bihêle em Dawid bidin destê te.”

²¹ Şawûl got: “Xudan bila we pîroz bike! Hûn li ber min ketin.

²² Herin li pey bigerin ka Dawid xwe li ku vedişêre. Li ku dimîne, kî wî dibîne, baş hîn bibin. Çimkî ji bo wî dibêjin pir fêlbaz e.

²³ Li ku xwe vedişêre hîn bibin û ji min re bibêjin. Wê gavê ezê jî bi we re bêm. Heke Dawid li wir be, di nav tevahiya binemalên Cihûdayê de ezê lê bigerim û wî bibînim.”

²⁴ Bi vî awayî Zîfî rabûn û beriya Şawûl, çûn Zîfê. Wê gavê Dawid û zilamên wî li Beriya Maonê ango Yeşîmonê ku diket Başûrê Eravayê.

²⁵ Dawid ku bihîst Şawûl û zilamên wî hatine lê digerin, dakete jêr û xwe di zinarê li Beriya Maonê de parast. Dema ku Şawûl ev bihîst, li pey Dawid çû Beriya Maonê.

²⁶ Şawûl li vî aliyê gelî, Dawid û zilamên wî jî li aliyê din ê gelî ber bi hev ve dimeşiyan. Dawid hewl dida ku bireve û xwe ji Şawûl û zilamên wî rizgar bike. Leşkerên Şawûl ji bo Dawid û zilamên wî bigirin nêzîk bûn.

²⁷ Qasid hat û ji Şawûl re got: “Zû were! Filîstî êrîşî welêt dikin.”

²⁸ Li ser vê yekê Şawûl dev ji Dawid berda. Rabû çû ku li dijî Filîstiyan şer bike. Loma ji wê derê re Sela-Hammahleqot hat gotin.

²⁹ Dawid ji wir derket, xwe li sitargehên herêma Eyn-Gediyê veşart.