Samûêl I, 21 - Kurmanji Încîl

Dawid ji Şawûlê Padîşah direve

¹ Dawid hat bajarê Novê, ba Ahîmelekê Kahin û Ahîmelek bi tirs pêşwaziya Dawid kir û jê re got: “Çima tu bi tenê yî û li ba te tu kes tuneye?”

² Dawid ji Ahîmelekê Kahin re got: “Padîşah emrê tiştekî da min û ji min re got: Bila derbarê tiştê ku min ji te re emir kir de tu kes tiştekî nizanibe. Herçî xulamên min in, min ew şandin.

³ Niha li ba te çi heye? Pênc nan an jî çi hebe bide min.”

⁴ Kahin got: “Bi min re nanê xwarinê tuneye, lê heke xortan xwe ji jinan dûr girtibin, nanê pîroz heye.”

⁵ Dawid got: “Bi rastî wekî her car em ji jinan dûr ketine, em bi ku ve jî herin, xulamên min xwe paqij dihêlin. Wê îro bêtir paqij bin.”

⁶ Kahin nanê pîroz dayê. Çimkî li wir ji bilî nanê pîroz tu nan tunebû. Dema ku ev nan ji hizûra Xudan dihat hildan, nanê germ datanîn cihê wê.

⁷ Wê rojê xulamekî Şawûl li hizûra Xudan hatibû peywirdarkirin. Ji Edomê bû û navê wî Doêg bû. Ew serşivanê Şawûl bû.

⁸ Dawid ji Ahîmelek re got: “Li ba te rim an şûrek heye? Li ba min ne rim, ne jî şûr heye. Çimkî karê padîşah lez bû, min neanîn.”

⁹ Kahin got: “Va ye şûrê Golyatê Filîstî ku te li Newala Elayê ew kuştibû. Şûr, ew li pişt êfodê bi kincekî hatibû pêçandin. Dixwazî bibe. Wekî din tiştekî din tuneye.” Dawid got: “Jê çêtir tuneye, bide min.”

¹⁰ Dawid rabû û wê rojê ji ber Şawûl reviya, çû ba Axîşê Padîşahê Gatê.

¹¹ Peywirdarên Axîş jê re got: “Ma ev ne padîşahê welatê Îsraêl Dawid e? Ma ne ew e ku di govendê de li ser wî dibêjin: “‘Şawûl kuşt bi hezaran, Dawid kuşt bi deh hezaran’?”

¹² Dawid ev gotin xistin dilê xwe û ji Axîşê Padîşahê Gatê gelekî tirsiya.

¹³ Xwe li dewsa dîna danî û helwesta xwe guhert. Deriyên dergehê bajêr da ber nehpûçkan û gilêz ji dev û lêvên wî hat.

¹⁴ Axîş ji xulamên xwe re got: “Hûn dibînin ku ev dîn e. We çima anî ba min?

¹⁵ Ma ez hewcê dînan im? Ji bo ku dînîtiyê bike we aniye ba min? Evê çawa bikeve mala min?”