Samûêl I, 11 - Kurmanji Încîl

Şawûlê Padîşah Emmoniyan têk dibe

¹ Nahaşê Padîşahê Emmonê, çû ser Yavêş-Gîladê û ew dorpêç kir. Tevahiya Yavêşiyan ji Nahaş re got: “Bi me re peymanekê çêke, emê xulamiyê ji te re bikin.”

² Nahaşê Emmonî got: “Ezê bi şertekî bi we re peymana çêkim. Ji bo ku tevahiya gelê Îsraêl nizim bikim, ezê çavê we yê rastê derxim.”

³ Rîspiyên bajêr jê re got: “Ji bo ku em qasidan bişînin seranserê welatê Îsraêl, heft rojan wext bide me. Heke kesekî me rizgar bike dernekeve, îcar emê teslîmî te bibin.”

⁴ Dema qasid hatin Gîvaya ku Şawûl lê dijî û tiştên qewimî ji gel re gotin, herkes bi dengekî bilind giriya.

⁵ Di wê kêliyê de Şawûl li pey gayên xwe ji zeviyê vedigeriya. Wî got: “Çi qewimiye? Çima hûn wisa digirîn?” Tiştên ku Yavêşiyan gotibûn, jê re jî gotin.

⁶ Şawûl gava ev gotin bihîstin, Ruhê Xwedê bi hêzeke mezin hat ser wî. Hêrsa Şawûl rabû.

⁷ Cotek ga hildan û ew perçe kirin. Bi destê qasidan, ew perçe şandin seranserê welatê Îsraêl û wiha got: “Her kesê ku nede pey Şawûl û Samûêl, wê wiha were ser gayên wî jî.” Tirsa Xudan kete ser gel. Gotina xwe kirin yek û bi hev re çûn.

⁸ Şawûl ew li Bezeqê da hev û tevdîra şer kir. Hejmara gelê Îsraêl sê sed hezar û hejmara gelê Cihûda sî hezar kes bûn.

⁹ Ji qasidên Yavêşî re wiha gotin: “Ji xelkê Yavêş-Gîladê re bêjin: ‘Heta sibê nîvro hûnê rizgar bibin.’” Gava qasid çûn û ev xeber gihandin wan, Yavêşî gelekî kêfxweş bûn.

¹⁰ Ji Emmoniyan re got: “Emê sibê teslîmî we bibin. Hûn çi dixwazin bi me bikin.”

¹¹ Roja din Şawûl zilamên xwe kirin sê beş. Ew di nobeta sibehê de ketin artêşgeha Emmoniyan. Qirkirin heta germa rojê berdewam kir. Kesên sax man belav bûn. Kit ji wan nehiştin.

¹² Gel ji Samûêl re got: “Wan kesan bînin ku em wan bikujin, kesên ku digotin: ‘Şawûl kî ye ku padîşahî ji me re bike?’”

¹³ Lê Şawûl wiha got: “Îro wê tu kes neyê kuştin. Ji ber ku Xudan îro rizgarî da gelê Îsraêl.”

¹⁴ Samûêl ji gel re got: “Werin em herin Gîlgalê û Şawûl ji nû ve bikin padîşah.”

¹⁵ Gel jî çû Gîlgalê û Şawûl ji nû ve kir padîşah. Li pêşiya Xudan qurbanên aştiyê serjê kirin. Şawûl û tevahiya gelê Îsraêl gelekî şa bûn.