Padîşah I, 4 - Kurmanji Încîl

Peywirdarên Silêmanê Padîşah

¹ Silêmanê Padîşah, li ser tevahiya gelê Îsraêl bû padîşah.

² Serekên wan ev bûn: Ezaryayê kurê Sadoq kahin bû.

³ Kurên Şîşayê, Êlîhoref û Ahiya nivîsende bûn. Yehoşafatê kurê Ahîlûd dîroknivîs bû.

⁴ Benayayê kurê Yehoyada fermandar bû. Sadoq û Aviyatar kahin bûn.

⁵ Ezaryayê kurê Natan serekê waliyan bû. Zavûdê kurê Natan kahin û hevalê padîşah bû.

⁶ Ahîşar berpirsê qesrê bû û Adonîramê kurê Evda berpirsiyarê suxrevanan bû.

⁷ Li ser gelê Îsraêl duwanzdeh waliyên Silêman hebûn. Wan ji bo padîşah û maliyên wî, xwarin û vexwarin peyda dikirin. Peydakirina xwarin û vexwarinê di salê de ji bo her mehekê, li ser waliyekî bû.

⁸ Navên wan ev bûn: Li herêma çiyayî ya Efrayîmê, Ben-Hûr bû.

⁹ Li Maqas, Şaelbîm, Bêtşemeş û Elon-Bêthananê, Ben-Deqer bû.

¹⁰ Li Arûbbotê, Ben-Hesedê ku Soxo û tevahiya herêma Hêferê girêdayiyê wî bû.

¹¹ Li tevahiya Dora Nafatê, Ben-Avînadav bû ku bi Tafata keça Silêman re zewicî bû.

¹² Li Taenax, Megîddo, tevahiya Bêtşeana ku li jêra Yîzreyêlê û li kêleka Saretanê ye, ji Bêtşeanê heta Avêl-Meholayê, ji wir heta wî aliyê Yoqmeamê, Baenayê kurê Ahîlûd bû.

¹³ Li Ramot-Gîladê, Ben-Gever bû. Li wir, li wargehên Yayîrê kurê Minaşşe yên li Gîladê û li şêst bajarên mezin ên bisûr û bi dergehên bi zirzeyên tûncîn hatibûn xurtkirin di bin destê wî de bûn. Ew bajar li herêma Argova Başanê bûn.

¹⁴ Li Mahanayîmê, Ahînadavê kurê Îddo bû.

¹⁵ Li Nefteliyê, Ahîmaes bû ku bi Basemata keça Silêman re zewicî bû.

¹⁶ Li Aşêr û Baalotê, Baenayê kurê Huşay bû.

¹⁷ Li Îssexarê, Yehoşafatê kurê Parûah bû.

¹⁸ Li Binyamînê, Şîmiyê kurê Ela bû.

¹⁹ Li herêma Gîladê, ango li diyarê Sîhonê Padîşahê Amoriyan û Ogê Padîşahê Başanê, Geverê kurê Ûrî bû. Herwiha li welatê Cihûda bi tenê waliyek hebû.

Hewcedariyên rojekê yên Silêmanê Padîşah

²⁰ Cihûda û Îsraêl wekî sêlaka ber deryayê zêde bûbûn; dixwarin, vedixwarin û di nav şahiyê de bûn.

²¹ Silêman, ji Feratê heta welatê Filîstiyan, heta sînorê Misrê jî, li ser hemû padîşahiyan serwer bû. Wan bac anîn û di tevahiya jiyana xwe de xizmeta Silêman kirin.

²² Xwarin û vexwarina rojane ya qesra Silêman, sî kewar arvanê hûr, şêst kewar arvan,

²³ deh gayên dermale, bîst gayên mêrgê, pezkovî, xezal, gakovî herwiha ji bilî mirîşkên qelew, sed jî pez bûn.

²⁴ Ji ber ku li tevahiya herêma ji aliyê rojava yê Feratê, ji Tîfsahê heta Xezayê li ser tevahiya padîşahên aliyê rojava yê Feratê serweriya xwe dajot. Li dorhêlê aştî hebû.

²⁵ Di tevahiya jiyana Silêman de, ji Danê heta Beêr-Şevayê, Cihûda û Îsraêl li bin mêw û darhejîra xwe, di nav ewlehiyê de rûniştin.

²⁶ Ji bo erebeyên Silêman ên şer, di tewlan de çar hezar beşên hespan û duwanzdeh hezar jî siwarî hebûn.

²⁷ Wan waliyan, ji bo Silêmanê Padîşah û ji bo her kesê tê ser sifra wî, her yekî ji wan di meha xwe de, xwarin peyda dikir. Tu tiştî kêm nedihiştin.

²⁸ Waliyan ji bo hespên beza û hespên din beşê li wan hatiye diyarkirin ka û ceh dianîn cihekî kifşkirî.

Şehrezayiya bêhempa ya Silêmanê Padîşah

²⁹ Xwedê şehrezayî, fêmdariyeke kûr û wekî sêlaka ber deryayê zêhneke mezin da Silêman.

³⁰ Şehrezayiya Silêman, ji tevahiya şehrezayiya rojhilatiyan û ji tevahiya şehrezayiya li Misrê zêdetir bû.

³¹ Çimkî ew ji tevahiya mirovan, ji Êtanê Ezrahî û ji kurên Mahol; Hêman, Kalkol û Darda şehrezatir bû. Di nav hemû miletan derdorê de navdar bû.

³² Wî sê hezar meselok gotin û hezar û pênc stranên wî hebûn.

³³ Silêman li ser şînahiyê, ji dara sedrê ya Lubnanê heta giyayê cehtirê ku di dîwaran de şîn dibe, got. Wî li ser heywanan, teyran, afirîdên ku bi erdê ve dişêlin û masiyan jî got.

³⁴ Ji bo ku guhdariya şehrezayiya Silêman bikin, ji tevahiya neteweyan û ji tevahiya padîşahên dinyayê yên şehrezayiya wî bihîstin, kesên xwe şandin ba wî.