Nahûm 3 - Kurmanji Încîl

¹ Wey li bajarê xwînrijandinê! Ew seranser bi derew û talankariyê tije ye, Dawiya nêçîrê tuneye.

² Dengê qemçiyê, dengê teqereqa tekelan! Hesp dibezin û erebeyên şer dipengizin!

³ Siwar tên pêş! Şûrê birqavêj, rima birqonek, Gelek kuştî, komên miriyan, Dawiya laşan tuneye! Piyê wan bi laşên wan diterpilin!

⁴ Her tişt ji ber fihûşên wê fahîşeyê derket, Ji ber wê yara xweşik, kêşîner û sêrbaz, Ku wê bi fihûşa xwe milet firotin Û bi sêrbaziya xwe jî gelan.

⁵ Gotina Xudanê Karîndar ev e: “Nînewayê! Va ye ez li dijî te me, Ezê dawa te bavêjim ser rûyê te. Ezê tazîbûna te nîşanî miletan Û şerma te nîşanî padîşahiyan bidim.

⁶ Ezê kirêtiyan bavêjim ser te, Ezê te rezîl bikim û bidim temaşekirin.

⁷ Hemû kesên li te binêrin wê ji te birevin Û bêjin: ‘Nînewa xera bûye, Wê kê ji bo wan li xwe bixe? Ezê kê bibînim ku te teselî bike?’”

⁸ Ma tu ji No-Amonê çêtir î? Ew bajar li ber Nîlê bû, Li derdorê av hebûn. Sûrên wî derya, dîwarên wî jî av bûn.

⁹ Kûş û Misir qeweta wî bêsînor bû, Pût û Lîbya alîkarên wî bûn.

¹⁰ Dîsa jî ew hat sirgûnkirin, Gelê wî êsîr bû. Zarokên wî jî li serê her kuçeyê hatin perçekirin. Ji bo rûmetdarên wî pişk hat avêtin, Hemû mezinên wî hatin zincîrkirin.

¹¹ Tê jî serxweş bibî, Tê xwe veşêrî, Tê ji ber dijminan li sitargehekê bigerî.

¹² Hemû kelehên te wekî darhejîrên berê pêşî ne, Heke bê daweşandin, wê bikevin devê kesê dixwe.

¹³ Va ye, leşkerên te bûn wekî jinan. Dergehên welatê te bi firehî ji dijminan re vebûn, Agir zirzeyên dergehên te daqurtandin.

¹⁴ Ji bo dorpêçkirinê ji xwe re avê bikişîne, Kelehên xwe zexim bike. Bikeve nava heriyê û pê li gilê bike, Qalibên kelpîçan rake.

¹⁵ Li wir wê agir te daqurtîne, Wê şûr te helak bike. Wê wekî kuliyan te bixwe û daqurtîne. Loma tu xwe wekî kuliyan zêde bike, Wekî kuliyên ciwan zêde bibe!

¹⁶ Te bazirganên xwe ji stêrên ezmanan jî zêdetir kirin, Lê wê kulî te bişelînin bifirin û herin.

¹⁷ Parêzvanên te wekî kuliyan, Fermandarên te wekî refê kuliyan in. Ew di hênikahiya rojê de Xwe li ser sincan datînin, Dema roj hiltê direvin Û tu kes nizane li ku ne.

¹⁸ Ya Padîşahê Aşûrê! Şivanên te xilmaşî, Mezinên te xewar in. Gelê te belav bû çû çiyê Û kesek tuneye berhev bike.

¹⁹ Derman tuneye êşa te bikewîne, Birîna te baş nabe. Her kesê xebera te dibihîze ji bo te li çepikan dixe, Çimkî kesek maye ku xerabiya te ya herdemî lê nebûye?