Methelokên 5 - Kurmanji Încîl

Hişyarkirina li dijî zinayê

¹ Lawo, guhdariya şehrezayiya min bike, Guh bide fêmdariya min

² Ku tu ferasetê bigîrî Û lêvên te zanabûnê biparêzin.

³ Çimkî ji lêvên jina çavlider hingiv diherike Û devê wê ji zeytê nermtir e.

⁴ Lê di dawiyê de, ew wekî zirîçkê tehl e, Wekî şûrê dudev tûj e.

⁵ Lingên wê dadikevin mirinê, Gavên wê digihîjin diyarê mirinê.

⁶ Ew di riya jiyanê de rast naçe, Rêçikên wê xerab in Û ew bi xwe jî pê nizane.

⁷ Niha lawo, min bibihîze, Averê nebe ji gotinên devê min.

⁸ Riya xwe ji wê jinê dûr bigire, Nêzîkî deriyê mala wê jî nebe.

⁹ Yan na, tê rûmeta xwe bidî kesên din, Tê salên xwe bidî mirovên zalim.

¹⁰ Wê xerîb ji serweta te têr bibin, Wê keda te bikeve mala biyaniyekî.

¹¹ Di rojên te yên dawî de Gava goşt û bedena te telef bibe, Tê dest bi şînkirinê bikî.

¹² Tê bêjî: “Çawa min ji terbiyê nefret kir! Dilê min erzşikandinê kêm dît!

¹³ Min guhdariya dengê mamosteyên xwe nekir, Min guh neda dersdarên xwe.

¹⁴ Niha di nav civat û civakê de, Hindik mabû ez bikevim nav rewşa herî xerab.”

¹⁵ Ji sarinca xwe avê vexwe, Ava ji bîra xwe diherike.

¹⁶ Çima kaniyên te biherikin derve? Çima coyên avên te li meydanan belav bibin?

¹⁷ Bila ew tenê yên te bin, Bi xerîban re parve neke.

¹⁸ Bila kaniya te bi bereket be, Bi jina xortaniya xwe re şa be.

¹⁹ Wekî xezaleke delal, wekî karxezaleke nazdar be. Bila pêsîrên wê hergav te têr bikin, Bi evîna wê hergav sermest be.

²⁰ Lawo, tê çima bi jineke çavlider sermest bî, Tê çima bikevî paşila jineke bêwefa?

²¹ Hemû riyên mirovan li ber çavê Xudan in, Ew hay ji hemû riyên wan heye.

²² Wê xerab bikeve dafika neheqiyên xwe Û bi benên gunehên xwe ve bê girêdan.

²³ Wê ji tunebûna terbiyeyê bimire Û ji ehmeqiya zêde riya xwe şaş bike.