Methelokên 16 - Kurmanji Încîl

¹ Pîlanên dil ji mirovan e, Lê bersiva zimên ji Xudan e.

² Hemû riyên mirov di çavê wî de pak in, Lê Xudan niyetan datîne ser mêzînê.

³ Karên xwe bispêre Xudan Wê pîlanên te pêk werin.

⁴ Xudan her tiştî ji bo armancekê afirand, Kesê xerab jî, ji bo roja xerab.

⁵ Her kesê dilqure li ber Xudan kirêt e, Bawer bin bêceza namîne.

⁶ Bi dilsozî û dilovanî xerabî tê nixamtin Û bi tirsa Xudan, mirov ji xerabiyê dûr dibin.

⁷ Gava Xudan ji riyên mirovan razî be, Dike ku bi dijminên wan re jî aş be.

⁸ Karê hindik ê heq, Ji serweta neheq çêtir e.

⁹ Mirov di dilê xwe de riya xwe saz dike, Lê Xudan rêberiya gavên wî dike.

¹⁰ Biryarên Xwedê li ser lêvên padîşah in, Devê wî di dîwanê de neheqiyê nake.

¹¹ Mêzîn û elbikên adil, ên Xudan in, Hemû kevirên giraniyê, karê wî ne.

¹² Xerabî ji bo padîşahan kirêt e, Çimkî text bi edaletê ava dibe.

¹³ Padîşah ji lêvên rast razî ye, Ji kesên rastgo hez dike.

¹⁴ Hêrsbûna padîşah qasida mirinê ye, Kesê şehreza, wê aş dike.

¹⁵ Di ronahiya rûyê padîşah de jiyan heye, Razîbûna wî wekî ewrê barana biharê ye.

¹⁶ Standina şehrezayiyê ji zêrê xas çêtir e, Standina fêmdariyê ji zîv baştir e.

¹⁷ Riya dilrastan ji xerabiyê dûr e, Kesê hay ji riya xwe heye, canê xwe diparêze.

¹⁸ Beriya hilweşînê pozbilindî, Beriya ketinê jî ruhê quretiyê tê.

¹⁹ Di nav bindestan de nefsbiçûkî, Bi qureyan re, ji parvekirina talên çêtir e.

²⁰ Kesê guhdariya şîretê dike, qenciyê dibîne Û kesê bi Xudan ewle ye bextewar e.

²¹ Ji kesê dilşehreza re fêmdar tê gotin Û zimanşîrînî hînbûnê zêdetir dike.

²² Serwextî ji bo xweyê xwe kaniya jiyanê ye, Lê ehmeqî terbiyeya ehmeqan e.

²³ Dilê şehrezayan aqil dide devê wan, Hînkirinê li ser lêvên wan zêdetir dike.

²⁴ Gotina keremê şana hingiv e, Ji bo can şîrîn, ji bo hestiyan şifa ye.

²⁵ Rê heye li ber mirovan rast xuya dike, Lê dawiya wê dibe mirinê.

²⁶ Dilê xebatkar dibije xebata wî, Birçîbûn wî li karî sor dike.

²⁷ Zilamê xerab xerabiyê çêdike, Li ser lêvên wî agirekî gur heye.

²⁸ Zilamê tevlihev dike, pevçûnê dertîne, Buxtanbêj dostên nêzîk ji hev vediqetîne.

²⁹ Zordar cîranên xwe dixapîne Ku wan di riya nebaş de dimeşîne.

³⁰ Çavgirtin ji bo pîlanên hîlekariyê, Devgirtin ji bo kirina xerabiyê ye.

³¹ Porê spî taca rûmetê ye, Bi jiyana rast hatiye bidestxistin.

³² Kesê zû hêrs nabe, ji mêrxasekî, Kesê hay ji nefsa xwe heye, ji kesê fetha bajaran kiriye çêtir e.

³³ Pişk tê avêtin, Lê her biryara wê ji Xudan e.