Lêwiyî 5 - Kurmanji Încîl

¹ “‘Heke kesek li ser naletkirina tiştekî şahidî kiribe, dîtibe yan zanibe lê tu tiştî nebêje, wê ew kes gunehkar bê hesibandin û divê bê cezakirin.

² “‘An heke kesek bêyî ku hay jê hebe bi tiştekî qirêj bibe –bi termê heywanekî qirêj, kovî yan kedî yan bi termê heywanekî qirêj ê ku bi erdê ve dişêle bibe jî– ew qirêj bûye û sûcdar tê hesibandin.

³ “‘An heke kesek bi nezanî bi mirovekî ku qirêj tê hesibandin an her tiştekî ku mirov qirêj dike bibe, gava haya wî ji vê yekê çêbe, wê sûcdar bê hesibandin.

⁴ “‘An heke kesek sonda kirina tiştekî baş an xerab bike lê li ser wê baş nafikire, bi tenê lêvên xwe bilebitîne û vê yekê bi nezanî bike, gava haya wî jê hebe, wê sûcdar bê hesibandin.

⁵ “‘Gava kesek ji van sûcan yekî kiribe, divê li sûcê xwe mikûr bê.

⁶ Wê wekî pêşkêşiya berdêlê, pêşkêşiya paqijiyê pêşkêşî Xudan bike. Wê ev ji pêz, mî yan bizina mê be. Wê kahin ji bo gunehê wî kefaretê bide.

⁷ “‘Heke hêza wî têra dayîna mî yan bizinekê neke, wê wekî pêşkêşiya berdêlê du qumrî yan du kevokan pêşkêşî Xudan bike. Wê yekî wekî pêşkêşiya paqijiyê û yê din jî wekî qurbana şewitandinê bîne.

⁸ Wê wan bîne ba kahin û wê yê pêşî wekî pêşkêşiya paqijiyê pêşkêş bike. Wê serê çivîkê jêke lê ji laşê wê veneqetîne.

⁹ Wê hinek ji xwîna pêşkêşiya paqijiyê bi ser kêlekên gorîgehê ve bireşîne û xwîna mayî biherikîne erdê gorîgehê. Ev pêşkêşiya paqijiyê ye.

¹⁰ Wê kahin a diduyan wekî qurbana şewitandinê li gorî rê û rêbazên wê pêşkêş bike. Bi vî awayî wê kahin ji bo gunehê wî kefaretê bide û wê ew kes bê bexişandin.

¹¹ “‘Heke hêza wî têra dayîna du qumrî yan du kevokan neke, wê ji ber sûcê xwe wekî pêşkêşiya paqijiyê, dehyeka efaya arvanê hûr bîne. Wê zeytê nerijîne ser û guniyê bi ser de neke. Çimkî ev pêşkêşiya paqijiyê ye.

¹² Wê ew ji kahin re bîne û wê kahin wekî para diyarkirî kulmekê jê hilîne û li ser gorîgehê, ser pêşkêşiyên şewitandinê ya ji bo Xudan bişewitîne. Ev pêşkêşiya paqijiyê ye.

¹³ Bi vî awayî wê kahin ji bo gunehê ku wî kiriye kefaretê bide û wê ew kes bê bexişandin. Wekî pêşkêşiya dexlê, ya mayî wê ji kahin re be.’”

Pêşkêşiya Berdêlê

¹⁴ Xudan ji Mûsa re got:

¹⁵ “Heke kesek li ser tiştên pîroz ên Xudan bi nezanî guneh û nedilsoziyê bike, wê wekî pêşkêşiya berdêlê, beranekî bêqisûr pêşkêşî Xudan bike. Wê bihayê wî bi şekelê zîvîn, bi şekelê Pîrozgehê bê pîvan.

¹⁶ Wê bergîdana tiştê pîroz ê ku li ser wî guneh kiriye bide. Wê ji pêncan yekî jî deyne ser û bide kahin. Wê kahin beranê pêşkêşiya berdêlê ji bo wî kefaretê bide û wê ew kes bê bexişandin.

¹⁷ “Heke kesek bi nezanî tiştekî ku Xudan nekirina wî emir kiriye bike û guneh bike, wê sûcdar bê hesibandin û bê cezakirin.

¹⁸ Wê wekî pêşkêşiya berdêlê ji pêz beranekî bêqisûr yan heywanekî ku bihayekî wî heye, ji kahin re bîne. Wê kahin ji bo gunehê ku wî bi nezanî kiriye kefaretê bide û wê ew kes bê bexişandin.

¹⁹ Ev pêşkêşiya berdêlê ye. Wî kesî li dijî Xudan sûc kiriye.”