Lêwiyî 3 - Kurmanji Încîl

Pêşkêşiya Aştiyê

¹ “‘Heke pêşkêşî, qurbana aştiyê ya dewêr be, nêr an mê, divê ew heywanekî bêqisûr li hizûra Xudan pêşkêş bike.

² Wê destê xwe deyne ser serê pêşkêşiyê û li ber deriyê Konê Hevdîtinê serjê bike. Kurên Harûn ku kahin in wê bên û xwînê bi her aliyên gorîgehê ve bireşînin.

³ Ev pêşkêşiya şewitandinê ya ji bo Xudan e. Wê ji qurbana aştiyê tevahiya bezê ûr û roviyan,

⁴ herdu gurçik, bezê ser gurçikan û perdeya kezeba ku wê ji gurçikan veqetîne, pêşkêş bike.

⁵ Wê kurên Harûn wan bi qurbana şewitandinê ya li ser êzingên êgir, li ser gorîgehê bişewitînin. Ev pêşkêşiya şewitandinê ye ku bêhna wê bi Xudan xweş tê.

⁶ “‘Heke pêşkêşî, qurbana aştiyê ya ji bo Xudan, pezekî nêr an mê be, divê bêqisûr be.

⁷ Heke pêşkêşî berx be, wê li hizûra Xudan pêşkêş bike.

⁸ Wê destê xwe deyne ser serê pêşkêşiyê. Wê li ber deriyê Konê Hevdîtinê bê serjêkirin û wê kurên Harûn xwînê bi her aliyên gorîgehê ve bireşînin.

⁹ Wê bezê qurbana aştiyê ya ji bo Xudan, bê pêşkêşkirin. Ev pêşkêşiya şewitandinê ya ji bo Xudan e. Wê dûvê bibez ji binî bê jêkirin, tevahiya bezê ûr û roviyan,

¹⁰ herdu gurçik, bezê ser gurçikan û perdeya kezeba ku wê ji gurçikan veqetîne, pêşkêş bike.

¹¹ Paşê wê kahin wan li ser gorîgehê bişewitîne. Ev pêşkêşiya şewitandina xwarinê ya ji bo Xudan e.

¹² “‘Heke pêşkêşî bizin be, divê li hizûra Xudan bê pêşkêşkirin.

¹³ Wê destê xwe deyne ser serê pêşkêşiyê. Wê li ber deriyê Konê Hevdîtinê bê serjêkirin û wê kurên Harûn xwînê bi her aliyên gorîgehê ve bireşînin.

¹⁴ Ev pêşkêşiya şewitandinê ya ji bo Xudan e. Wê ji pêşkêşiyê tevahiya bezê ûr û roviyan,

¹⁵ herdu gurçik, bezê ser gurçikan û perdeya kezeba ku wê ji gurçikan veqetîne, pêşkêş bike.

¹⁶ Wê kahin hemûyan li ser gorîgehê bişewitîne. Ev pêşkêşiya şewitandina xwarinê ye ku bêhna wê xweş e. “‘Hemû bez yê Xudan e.

¹⁷ We ev di nav nifşên we de, li her dera ku hûn lê dijîn qanûneke herheyî be. Hûnê bez û xwînê nexwin.’”